Samanburður

Margrét var alveg uppgefin að kvöldi þjóðhátíðardags og steinsofnaði fyrir kvöldmat. Þegar hún rumskaði við að mamma hennar var að hátta hana fyrir nóttina varð hún hin fúlasta, af því að hún hafði misst af Addý og Báru sem kíktu í kvöldmat. Það hafði greinilega ekki verið nóg að gista hjá þeim í Skorradal.

Margrét var viss um að hún hefði misst af miklu fjöri. "Fóru Addý og Bára á trampólínið?" spurði hún, en Kata svaraði að það hefðu þær ekki gert.

"Gott," sagði hún.

Og svo hélt hún áfram: "Fékk Elísabet eftirrétt?", en Kata sagði að það hefði ekki verið boðið upp á neinn eftirrétt. "Bað hún um eftirrétt?" þurfti hún þá að vita og enn gat Kata svarað að svo hefði ekki verið.

Margrét virtist sátt við þetta.

Auðvitað þýddi þessi kvöldmatarlúr að henni gekk erfiðlega að sofna um kvöldið. Elísabet var löngu sofnuð en Margrét enn á vappi þegar nágrannarnir á nr. 2 bönkuðu upp á, nýkomnir frá útlandinu.

Þegar Elísabet frétti af þessari heimsókn í morgun byrjuðu sams konar yfirheyrslur og hjá systur hennar í gær. "Fór Marta María á trampólínið?" og "Voru Margrét og Marta María að leika?"

Og þegar hún frétti að Margrét hefði fengið frostpinna í gærkvöldi spurði hún hvort hún mætti fá í dag -og Margrét ekki!

Við mömmurnar tökum nú svona samanburðarrannsóknum af fálæti, enda er þetta hvimleitt. Þær systur gera sér reyndar grein fyrir því og spyrja yfirleitt varfærnislega og hikandi um allar þær lífsins listisemdir sem önnur þeirra fær að njóta á meðan hin hrýtur.

 

Athugasemdir

[hke (IP-tala skráð) 18.6.2007 kl. 12:52]

Samaburðarrannsóknir af þessu tagi þurfa ekki systkini til. Ef þau er ekki fyrir hendi er notast við frændsystkini, bekkjarsystkini, börn nágranna og börn sem eiga leið um hverfið. Lífið er fullt af lúxusóréttlæti, sýnist manni.

[Ragnhildur Sverrisdóttir, 18.6.2007 kl. 15:21]

Rétt, rétt, ég man sosum mörg dæmin um misskiptinguna á leikskólanum, sumir eiga yngri systkini, önnur eldri, aðrir hund eða kött...

[Kristín Björg Þorsteinsdóttir, 18.6.2007 kl. 15:47]

Það var mikill metingur hjá mínum þó tvö ár séu á milli. Get rétt hugsað mér hvernig þetta er hjá systrum á sama aldri! Þetta gengur yfir en er ægilega leiðinlegt meðan á því stendur...Mér finnst aldrei neitt mál þegar þær bera sig saman við önnur börn í öðrum fjölskyldum. Gera reyndar lítið sem ekkert af því. Vita sem er að það fær ekki hljómgrunn hjá okkur foreldrum þeirra

[hke (IP-tala skráð) 18.6.2007 kl. 20:42]

Einmitt. Og óréttlætið sem barnið verður fyrir er þetta; að eiga ekki síma! Ekki i-pod! Mega ekki sitja frammí (þótt hana vanti ca. 18 kíló í löglegt umfang), fá ekki að vera ein úti á kvöldin, til tíu, koma með sætabrauð í nesti í skólann og ... og ... En, maður ansar þessu auðvitað ekki.

[Ragnhildur Sverrisdóttir, 19.6.2007 kl. 10:38]

Hehe, það er greinilegt að blessuð börnin mæta afskaplega takmörkuðum skilningi heima fyrir þegar þau barma sér undan heiftarlegri misskiptingu gæðanna