Hundar og frjókorn

Magga Ósk kom í heimsókn með voffann Dreka litla, því ég mátti til með að prófa hvort ég fengi ofnæmi. Merkilegt nokk þá er ég enn heil heilsu, þrátt fyrir að hafa klappað Dreka og strokið mér svo vandlega í framan. Kannski er möguleiki að eignast hund eftir allt saman? Þetta verður rannsakað nánar. Og það er harðbannað að nefna þennan möguleika við systurnar, ég vil ekki að þær verði of vongóðar.

Ég er ekki sú eina á heimilinu með ofnæmi. Kata fær stundum heiftarlegt frjókornaofnæmi, þótt það gerist stórum og sjaldan. Stórt var það alla vega hérna um árið, þegar við vorum í San Fransisco. Við ákváðum að leigja okkur hrikalega flottan, rauðan blæjubíl og aka upp í vínræktarhéruð Kaliforníu, þar sem við áttum pantaða gistingu á litlu og notalegu gistiheimili.

Við ókum af stað með blæjuna niðri og vorum ekkert að flýta okkur. Fyrst ók ég, svo stoppuðum við og Kata tók mynd af mér við bílinn. Hvað er flottara en að standa við rauðan blæjubíl á sveitavegi í Kaliforníu? Svo ók Kata og ég myndaði hana auðvitað líka.

Við ókum um skógi vaxið svæði, upp og niður hæðir, sífellt norðar. Þá fór skyndilega að draga mjög af Kötu. Hún hnerraði, augun urðu blóðhlaupin og henni varð þungt fyrir brjósti. En áfram ókum við, með blæjuna niðri.

Þegar við komum í litla bæinn við Russian River var Kata nær dauða en lífi. Ég ók að næsta apóteki, Kata staulaðist inn, bar sig aumlega og fékk öflugasta lyf sem Kaninn selur "over the counter" við frjókornaofnæmi. Svo ókum við á gistiheimilið. Þar svaf Kata eins og steinn það sem eftir var helgarinnar.

Þegar við tékkuðum út af gistiheimilinu var Kata orðin stálslegin. Og lyfin góðu tryggðu að hún var laus við ofnæmið það sem eftir var Kaliforníudvalarinnar. Kaninn selur nefnilega ótrúlegasta stöff "over the counter", lyf sem aldrei yrðu samþykkt hér. Ég ætti kannski að benda aðstoðarmanni heilbrigðisráðherra á þetta?

Það þarf varla að taka það fram að þegar við ókum til baka til San Fransisco var blæjan uppi.

Athugasemdir

[Urður (IP-tala skráð) 20.6.2007 kl. 09:11]

Ja hérna. Loðdýrið í Varsjá sendir þér bestu kveðjur, og er sannfærð um að hún fái nú loksins að hitta þig, nú þegar ofnæmis - og over-the-counter lyfjamál hafa verið leyst (hún skilur ekki alveg muninn á milli púðluhunda og katta, en það er annað mál..) 'Eg lýsi hins vegar bara yfir ánægju minni með að hafa útsendara í heilbrigðisráðuneytinu og er sannfærð um að þess sé ekki langt að bíða að alls kyns þrumu-lyf verði á boðstólum í apótekum landsins ahemm... Manstu annars hvort þeir buðu upp á lyf við skýrslu-ofnæmi þarna í Amríku? knús frá frú Urr

[Ragnhildur Sverrisdóttir, 20.6.2007 kl. 14:23]

Ég er nú ekki viss nema loðdýrið í Varsjá geri mig fárveika um leið! Það ágæta dýr er líklega "náttúrulegra" en blessaður kjölturakkinn, það ræktaða eintak.

En varðandi lyf gegn skýrslu-ofnæmi: Ef það væri til, þá er ég viss um að Kata hefði fengið vænan skammt um leið og hún hóf störf í ráðuneyti  Held að þið verðið bara að bíta á jaxlinn.

Megi kosningar um heim allan fara vel fram undir þinni styrku stjórn.