Nostradamus

Ef Nostradamus hefði frétt af þeim váboða, sem mér bárust fregnir af, þá hefði hann ekki verið með einhverja óljósa spádóma út og suður. Hann hefði getað sagt hreint út: "Heimurinn mun svo sannarlega fara rækilega versnandi árið 2007."

Táknið er þetta: Samstarfsmaður minn til fjölda ára á Mogganum var maður sem ALLTAF átti Volvo, kallaði bílinn stoltur "fasteign á hjólum" og var með lítið barmmerki í jakkaboðungnum, þar sem stóð, að sjálfsögðu, Volvo.

Núna ekur þessi maður um á Hondu.

I rest my case.

Athugasemdir

[Urður (IP-tala skráð) 20.6.2007 kl. 18:09]

halló halló! heimur versnandi fer? Væri nú ekki nær að bjóða manninn velkominn í hondu-vinafélagið?? eða á hann ekki nógu margar hondur til að vera félagstækur..? ;)

eins og sést er ekki nóg að bíta á jaxlinn (læknisráð Dr R) þegar maður þjáist af heiftarlegu skýrslu-ofnæmi. Mun árangursríkara að plaga frú R!

[Ragnhildur Sverrisdóttir, 20.6.2007 kl. 22:19]

jájá, ég þræti ekkert fyrir að sjálf ek ég um á Hondu (reyndar er einn bíll á heimilinu í augnablikinu, frú Urr, svo tími tveggja Honda er liðinn). Það er nákvæmlega ekkert athugavert við að aka á Hondu, við höfum átt fjóra CRV í röð og nú ek ég á Jazzinum. Engin krosstré bregðast þótt ég aki á Hondu og njóti japansks hugvits.

En að Mr. Volvo taki upp á slíku!? Þú sérð það sjálf, frú Urr, að þá er fokið í flest skjól. Ekkert sænskt eðalstál, ekkert sænskt hugvit.

Stön og pust, gisp og gasp, eins og Andrés sagði áður en farið var að þýða hann (núna segir hann að vísu alltaf "Æps!" sem mér finnst undarleg upphrópun á íslensku)