Ritskoðun

Elísabet vakti mig kl. hálf fimm í nótt. Þá var vinstra auga hennar alveg límt aftur, svo þar var sama sýkingin komin og vakti hana vegna hægra auga nóttina á undan. Hún var róleg á meðan ég vætti klút og strauk yfir augað þar til það opnaðist og var svo fljót að stinga sér undir sængurhornið hjá mömmu sinni.

Gott að við fengum dropana hjá Þóru í gær. Og gott að Þóra á systur sem heitir Guðrún og er tannlæknir stelpnanna, hentugt að þetta liggi svona í fjölskyldum.

Systur urðu spenntar þegar þær sáu að færsla hérna á blogginu var í Mogganum í morgun. Ég varð að lesa pistilinn fyrir þær og þær fóru strax að gera athugasemdir. Sem er ein af ástæðunum fyrir því að ég ber ekki skrif mín undir þær fyrirfram, þær eru ótrúlega afskiptasamir ritskoðarar.

Athugasemdir

[Ragnhildur Sverrisdóttir, 27.6.2007 kl. 09:26]

Hehe, já, maður kemst ekki upp með neinn moðreyk

Og takk fyrir ráðið, sem þú hefur prófað á öllum helstu dýrategundum. Elísabet hefur nú strax skánað mikið. Hún vakti mig ekki klukkan hálf fimm eins og í fyrri nótt og nóttina þar á undan til að biðja mig að opna auga. Neinei, þess í stað vakti hún mig klukkan 3 með miklum gleðilátum af því að hvorugt augað var lokað! Dæs.... Hvað á maður að gera annað en samgleðjast?