Klappstýrur

Kosturinn við að vera tvíburi (þeir eru að vísu margir) er að hafa alltaf einhvern eindreginn stuðningsmann. Þær systur bakka hvor aðra upp alveg endalaust.

Í gær var Kata að fara yfir R-æfingarnar með Margréti, sem hefur enn ekki náð góðum tökum á þessum leiðinda staf. Ég hef fulla samúð með henni, enda komin vel á veg í barnaskóla þegar R-ið fór loksins að rúlla eðlilega. Ekki gott mál fyrir litla stelpu sem hét RagnhilduR SveRRisdóttiR. Úff.

Jæja, aftur að systrum. Æfingar Margrétar ganga út á að hún setji amerískt R inn í orð og þaðan fer svo hið íslenska að rúlla. Hún endurtók orðin eftir mömmu sinni, k-k-krani, d-d-dreyma og svo framvegis. Elísabet fagnaði hverju orði með óskaplegum upphrópunum: "Já, flott þetta Margrét! Og þetta var sko íslenskt R, ekki bara amerískt R!"

Svona lét hún þar til ég tók hana í fangið og fór með hana í næsta herbergi, enda voru æfingarnar að leysast upp í tómt rugl, þótt Margréti þætti hólið gott.

Margrét dembir líka lýsingarorðum í hástigi yfir systur sína í hvert sinn sem Elísabet teiknar eitthvað. Margrét er satt best að segja alveg ótrúlega laginn teiknari og systur hennar finnst súrt í broti að hennar teikningar séu ekki jafn fínar. Margrét þreytist hins vegar aldrei á að segja henni að víst séu þær flottastar, frábærastar og fallegastar.

Þetta byrjaði afskaplega snemma hjá þeim systrum. Ég man eftir einu skipti, þegar þær voru fjögurra ára og við vorum allar fjórar að spjalla saman. Þá varð Elísabet alltaf fyrri til að svara spurningum sem beint var til þeirra systra og Margrét varð eitthvað leið og sagðist ekki vita eins mikið og Elísabet. Að sjálfsögðu hamaðist systir hennar við að sannfæra hana um að þetta væri rangt: "Ég veit ekki meira Magga mín. Og þú ert alltaf svo góðleg, en ég er alltaf svo kjánaleg." Svo gretti hún sig, systir hennar fór að hlæja og málinu var bjargað.

Ég man að þegar þær voru enn minni, 1-2 ára, þá hittum við Kata tvíburasystur í Kringlunni, stelpur sem Kata kannaðist við frá fyrri tíð og eru núna fullorðnar. Þær dáðust að litlu skottunum og lýstu því svo yfir að það allra besta við að eiga tvíburasystur væri fullvissan um að annar einstaklingur væri sannfærður um að þú værir það frábærasta á jörðinni.

Athugasemdir

[Jenný Anna Baldursdóttir, 28.6.2007 kl. 15:40]

ERRRRIN eru sérstaklega skemmtilegt viðfangsefni. Frá áramótum hefur Jenny Una Errrriksdóttirrr getað sagt err og hún er enn að rúlla þeim.  Dæmi: Farrrrðu, Einarrrrr, gerrrrra og hún verður svo sæl á svipinn í hvert skipti.  Ég held að þetta hafi verið erfiðasta verkefnið hennar í lífinu til þessa en hún varð 2. árrrra þ. 30. des. s.l.

Þessar systur eru hreint dásamlegar og ég bíð spennt eftir hverri færslu enda súper skemmtilega skrifaðar (viðfangsefnin gefa líka næg tilefni til þess) og svo eru þær fullar af kærleika og húmor.

Þangað til næst

[Guðrún Emilía Guðnadóttir, 28.6.2007 kl. 20:06]

Það var líka RRRRRR vandamál  hjá dóttur minni og mér með  Guðrúnu Emilíu sátum við á hverjum degi við æfingar og Sigrún Lea Hjálpaði systur sinni út í eitt, við vorum með sérstök spil,  en það sem mér fannst koma best út  var bóka og kvæðalestur það fannst þeim skemmtilegast  sjálfum. Ég er sammála Jenný þessar stelpur eru frábærar, en með fullri virðingu fyrir öllum uppalendum, þá er það menningarlega og víðsýna uppeldi sem þær örugglega fá þessar stelpur bara  gott veganesti út í lífið.
                          hlakka til að lesa næstu frásögn
                                             Góðar stundir.