Verst í heimi

Þegar stelpur komu heim fóru þær að sjálfsögðu beint út í garð, enda önnur eins paradís vandfundin í svona veðri. Kata hoppaði með þeim á trampólíninu á meðan ég grillaði og eftir matinn fóru þær aðeins í pottinn. Svo borðuðu þær yfir sig af jarðarberjum, enn eina ferðina.

Eftir desertinn kúrðum við á sólbekkjum og vorum eitthvað að fíflast. Margrét var með einhverjar fyndnar hótanir við mig, sem ég man nú ekki af hverju stöfuðu. Þá spurði ég hana hvað henni þætti verst í heimi. Hún neitaði að segja mér það, enda áttaði hún sig strax á að ég ætlaði að hóta henni einhverri slíkri skelfingu.

Kata sagðist alveg vita hvað Margréti þætti verst í heimi: Hálftugginn matur í munni. Það fór greinilegur hrollur um Margréti klígjugjörnu og hún þurfti töluvert knús og kitl áður en hún var búin að jafna sig á ósköpunum. Reyndar fauk aðeins í hana og hún minnti okkur á að einu sinni hefði stelpa á leikskólanum opnað munninn, fullan af hálftuggnum mat "og ég gubbaði á gólfið í leikskólanum og ég var að borða lasagna og það var rauð paprika í gubbinu. Ég hata papriku."

Eftir drykklanga stund sagði hún svo: "Ég veit um eitt sem er áreiðanlega verst í heimi."

-Nú, hvað er það, spurðum við og áttum von á einhverju sakleysislegu, á okkar mælikvarða að minnsta kosti.

"Verst í heimi er ef maður þarf að skipta um mömmur," sagði þá krúttið.

Henni var nú ekki hótað meiru þann daginn.

Athugasemdir

[ÁSthildur (IP-tala skráð) 29.6.2007 kl. 00:17]

Sælar allar hoppandi frænkur í Logalandi.Þetta eru nú meiri krúttin .Passið uppá að Margrét fari ekki að hoppa of mikið á trampólíninu með öll jarðarberin í maganum ! Bestu solarkveðjur til ykkar ,Ásta frænka

[Björg K. Sigurðardóttir, 29.6.2007 kl. 00:46]

Ég tek undir það með síðasta ræðumanni að þetta eru meiri krúttin sem þú átt. Ég er nú bara ókunnug manneskja en er farin að kíkja inn á síðuna þína á hverjum degi og lesa þessar skemmtilegu sögur af þeim systrum.

Bestu þakkir fyrir skemmtilegt blogg, 

[Ragnhildur Sverrisdóttir, 29.6.2007 kl. 10:18]

Margrét hikar sko ekkert við að hoppa á trampólíni með fullan maga! Verst er þegar hún krefst þess að við hoppum með. Þótt kvöldmaturinn hafi verið í léttari kantinum, kjúklingaspjót og salat, þá var ég nú ekkert sérstaklega spennt fyrir að strokka hann í maganum með hoppi.

Takk fyrir góðar kveðjur, mér finnst svo gaman að sjá þegar ættingjar og vinir lesa og mér finnst líka afskaplega gaman að ókunnugt fólk úti í bæ kíki hérna við  Í gær hringdi í mig maður, sem hefur lesið síðuna af og til og vildi endilega senda þeim systrum bækur í kveðjuskyni. Mikið fannst mér það notalegt samtal.