Svona er lífið

Bjarki Mögguvinur gisti í nótt. Hann er að vísu vinur þeirra systra beggja og félagi á Rauðudeild, en hann hefur lengi verið sérstakur "vinur" Möggu -og verðandi tengdasonur okkar Kötu ef krílin standa við stóru orðin.

Krakkarnir þrír hoppuðu sleitulaust á trampólíni, busluðu í pottinum, léku í kofanum, fóru í vatnsbyssuslag, borðuðu grillaðar pylsur og nutu lífsins. Margrét og Bjarki eru afar samtaka í sínum leik, klifruðu t.d. bæði upp á kant á heita pottinum og stukku svo út í hann miðjan með tilheyrandi gusugangi. Og voru bæði í hláturskasti í vatnsbyssuslagnum. Þau stilltu sig, en þó með miklum herkjum, á meðan Elísabet settist í heita pottinn.

Ég hef aldrei vitað börn sofna eins fljótt og þessi þrjú. Bjarki hafði varla stunið upp "góða nótt" en hann var steinsofnaður í rúminu hennar Elísabetar, sem vék úr því og færði sig yfir í gestarúm. Þær systur sofnuðu 10 og 15 sekúndum síðar.

Í morgun tókst okkur að halda þeim innan dyra til kl. 9, en þá héldu þeim engin bönd og þau stukku á náttfötum út á trampólín. Þá var ég búin að sannfæra sjálfa mig um að nágrannarnir væru hvort sem er ekkert sofandi á svona dýrðardegi.

Undir hádegi, þegar vinirnir voru enn á ný búnir með rúntinn trampólín, heitur pottur, kofi, heyrðist barnsgrátur af gangstígnum fyrir neðan garð. Þau hlupu öll þrjú á staðinn og þar var lítill gutti sem hafði meitt sig. Mamma hans var með í för, svo Bjarki, Elísabet og Margrét sáu ekki ástæðu til annars en að horfa þögul á. Loks sagði Bjarki: "Svona er lífið!", þær systur samsinntu og þau sneru öll þrjú heim í garð aftur.

Síðdegis fórum við mægður í hjólatúr niður í Fossvogsdal. Við stoppuðum við göngubrú, stelpurnar fóru úr skóm og sokkum og óðu út í litla tjörn. Þær ætluðu aldrei að fást heim aftur. Á svona stundum áttar maður sig á hvað það þarf lítið til að dagar 6 ára kríla séu fullkomnir.

Athugasemdir

[Guðmundur Örn Jónsson, 1.7.2007 kl. 12:17]

Það er greinilega gaman saman. Þetta er tími sem börnin muna alltaf eftir, þetta er frábært dæmi um svokallaðan gæða tíma með börnunum, því eins og þú bendir réttilega á þá er það samveran sem skiptir máli, en ekki rándýrar utnalndsferðir.  Mæli með því að fólk eyði meir tíma með börnum og minni í utanlandsferðir, líkamsræktastöðvar, ljósabekkjum..... Það er nefninlega heilmikil hreyfing í því að vera með börnunum úti og svo verður maður útitekinn og fínn.

[Guðrún Emilía Guðnadóttir, 1.7.2007 kl. 15:36]

Ég veit nú ekkert yndislegra en að vakna á morgnana við fuglasöng og barnaleik,
það eru börn á öllum aldri í kringum okkur og fullt af trampólínum þeir sem ekki þola það geta sett á sig eyrnaskjól.
Það hefur aldeilis verið gaman hjá  litlu englunum í gær.

[Jón Steinar Ragnarsson, 2.7.2007 kl. 00:14]

Svona dagar gleymast heldur trauðla og vaka með manni fram í ellina. 

[Edda Agnarsdóttir, 2.7.2007 kl. 00:48]

Það er svo yndislegt þega þú skrifar um börnin. Yljar manni vel og lengi.Takk.