Brók og buxur

Við morgunverðarborðið sneri Margrét sér að mömmu sinni og spurði: "Hvað heita stuttermabuxur?"

"Stuttbuxur," svaraði Kata.

"Mér finnst hitt flottara og ætla að segja það," sagði Margrét ákveðin.

Kata sagði það í besta lagi, svo framarlega sem hún vissi að svona buxur hétu í raun stuttbuxur.

Svo ókum við í fótboltaskólann. Í útvarpinu voru Birta og Bárður úr stundinni okkar að tala saman um sól og sumar og Bárður sagðist vilja fara í "stuttermabrók". Ég benti Möggu á að þessi skrítni náungi notaði sama orð yfir stuttbuxur og hún.

"Nei, hann segir brók en ekki buxur!" sagði hún hneyksluð.

"Já, en Margrét," sagði systir hennar, "hann er nú líka geimvera!"

Athugasemdir

[Jenný Anna Baldursdóttir, 16.7.2007 kl. 11:26]

Hahahahaha

Af hverju í ósköpunum var ég ekki búin að biðja umboðskonu systra um bloggvináttu?  Þakka fyrir boð og nú hef ég sett þig í "gjörgæsluna" í stjórnborðinu mínu þannig að ég missi ekki af einni einustu færslu um þær ofurstystur.

[Ragnhildur Sverrisdóttir, 16.7.2007 kl. 11:49]

Ég verð að reyna að standa undir þessari pressu

[Ragnhildur Sverrisdóttir, 16.7.2007 kl. 11:57]

Og takk kærlega fyrir að bloggvingast við mig