Bestu dagar

Á Ísafirði er bloggað á kaffihúsinu í Edinborgarhúsi, þar sem Helga Vala ræður ríkjum. Frábært að hafa svona alvöru kaffihús á staðnum.

Systur eru óskaplega hamingjusamar þessa dagana, þeytast um allar koppagrundir með hundana Tuma og Blöndu á hælunum, hlaupa á undan mæðrum upp í Naustahvilft, fá að róa litla árabátnum á Grundinni og í dag ætlum við að athuga hvort dvergarnir í Súkkulaðidal eru tilbúnir að lauma einhverju út úr þúfunum.

Á kvöldin kveikir Sverrir Karl frændi upp í miklum bálköstum. Mesta furða að systur skuli ekki hafa fengið reykeitrun, því þær eru einstaklega lagnar að standa alltaf með reykstrókinn upp í sig. Og stundum bindur besti frændi kassabílinn aftan í hjólið sitt og dregur skríkjandi systur um allar trissur.

Margrét segir á hverju einasta kvöldi: "Þetta var besti dagur lífs míns."

Athugasemdir

[Jón Steinar Ragnarsson, 26.7.2007 kl. 13:59]

Bestu dagar lífs míns voru sumardagar á Ísafirði þar sem hver dagurinn toppaði annan.  Margrét er ekki að fara með neitt fleipur.

[hke (IP-tala skráð) 26.7.2007 kl. 14:08]

Frábært... Krúttin.

Annars hef ég fengið alveg nýja sýn á listamannsheitið Snoop Dogg, á meðan þú ert fyrir westan. Þú gætir verið Scoop Dogg.

[Jenný Anna Baldursdóttir, 26.7.2007 kl. 16:46]

Lífsmark... loksins.   Margrétt segir allt sem segja þarf til að lýsa andrúmsloftinu þarna fyrir westan.  Hvað er það við Vestfirði????????  I don´t know, enda aldrei komist þangað.

Takk fyrir færslu.

[Ragnhildur Sverrisdóttir, 30.7.2007 kl. 09:17]

Bestu dagar liðnir í bili, en þeir koma aftur ;)