Kennsla í dónaskap

Systur eru orðnar mjög spenntar að byrja í skólanum. Í morgun léku þær skólaleik og skiptust á að vera kennari og nemandi.

Þær hafa stundum skemmtilegar hugmyndir um skólann. Eldri krakkar hafa sagt þeim undan og ofan af því sem þar fer fram, en það skolast stundum til. Einhver hefur einhvern tímann nefnt námsefni um 19. öldina, en hjá þeim systrum er "19. öldin" kennslustofa. "Jæja, ég er komin í 19. öldina og sest," tilkynnti Margrét og þar með gat Elísabet byrjað að kenna.

"Halló krakkar. Er einhver hérna sem var ekki í gær?" spurði Elísabet og Margrét, eini nemandinn, rétti upp hönd. "Jæja þá," sagði Elísabet, "við ætlum að læra stærðfræði, mannfræði og dónaskap."

Við Kata lágum á hleri, en urðum aldrei varar við kennslu í dónaskap. Hins vegar var kennarinn mjög iðinn við að kenna nemanda sínum mannasiði.

Athugasemdir

[Jenný Anna Baldursdóttir, 6.8.2007 kl. 15:33]

Hvað get ég skrifað, hvað get ég sagt?  Þú átt að gefa þessar örsögur út.  Ég hlæ og ég er í alvarlegu krúttkasti.  Hahahahaha

[hke (IP-tala skráð) 6.8.2007 kl. 16:12]

Ég held að Fíasól megi fara að vara sig. Vantar ekki einmitt barnabækur um sniðuga og orðheppna tvíbura? Ha, Ragnhildur [olnbogaskot, olnbogaskot]? Viðskiptahugmynd!

[Guðrún Emilía Guðnadóttir, 6.8.2007 kl. 17:23]

Hæ stelpur, þær eru alveg óborganlegar, sammála Jenný og hke maður getur bara hlegið og hlegið,
og þú ættir að gefa út bók. það er að byrja alveg frábær og líka erfiður tími hjá ykkur,
en það er bara að taka á því eftir hendinni, ritar ein með reynslu.
Ragnhildur gæti það verið að hann pápi þinn væri svona í umferðinni,
ég bara spyr því ég er svona eins og þú bara verri og
alveg eins og pápi minn. Hlakka til að heira er þær byrja í skólanum.

[Jóna Á. Gísladóttir, 6.8.2007 kl. 20:39]

hahaha. svo þær eru tvíburar dömurnar. þetta er kannski ekki svo ólíkt því að t.d. Flugleiðir eru með námskeið í lofthræðslu.

[Ragnhildur Sverrisdóttir, 6.8.2007 kl. 20:45]

Takk fyrir jákvæð viðbrögð og viðskiptahugmyndir

Já, þær eru tvíburar, með öllu sem því fylgir. Sem mér sýnast bara kostir, alla vega hef ég ekki rekið mig á neinn galla (ekki fyrir þær alla vega, en mikið fj.... vorum við Kata orðnar þreyttar eftir fyrstu tvö árin , sérstaklega hið fyrsta og svefnlausa)

Og ég ætla sko aldrei á námskeið í lofthræðslu, ég er alveg nógu lofthrædd sjálf! Get varla staðið upp á stól. En er reyndar alveg í lagi í flugvélum.

[Jóna Á. Gísladóttir, 6.8.2007 kl. 20:47]

ég meinti náttúrlega námskeið í flughræðslu

[Ragnhildur Sverrisdóttir, 6.8.2007 kl. 21:37]

Jájá, ég veit