Á

Á er stafur vikunnar og í kvöld myndskreyttu systur Á-blöðin sín.

Margrét teiknaði fyrst tvö spil, tvo ása. Hún hefur verið nokkuð upptekin af Veiðimanni undanfarið og finnst mjög gaman að spila.

Næsta mynd var ánamaðkur og enn gerði ég mig seka um ferkantaðan hugsunarhátt þegar ég furðaði mig á því af hverju hún litaði brúnt yfir alla myndina, en ekki bara maðkinn sjálfan. "Hann er oní moldinni!" sagði hún hneyksluð.

Þriðja mynd Margrétar var af skál á borði. Í skálinni voru banani, appelsína og epli. Ávextir.

Fjórða myndin var af stóru, rauðu og glampandi hjarta. Undir það skrifaði hún: "Ástin mín."

Elísabet sat hinum megin við borðið og myndskreytti sitt blað. Þær systur fylgdust hvor með annarri, en fóru eigin leiðir eins og venjulega.

Elísabet teiknaði fyrst lítinn álf með skotthúfu.

Næsta mynd var af álfadís með töfrasprota. Álfadísin var agnarsmá, rétt eins og álfurinn.

Næst sló Elísabet fjórar flugur í einu höggi. Henni tókst a.m.k. að setja fjögur Á inn í textann undir myndina: Ása er úti á árabát.

Lokamynd Elísabetar var svipaðrar ættar og Margrétar, alla vega er textinn undir henni einfaldur: Ást.

Á myndinni eru tvær konur og tvær stelpur. "Við fjölskyldan," sagði myndlistarmaðurinn.

Athugasemdir

[Guðríður Hrefna Haraldsdóttir, 4.10.2007 kl. 22:01]

Þær eru svo frábærar ...

[Jenný Anna Baldursdóttir, 5.10.2007 kl. 09:06]

Þetta krúttkast reyndist mér HÆTTULEGT, ég slengdi mér í stofuvegginn.  Taka skal mið af því að undirrituð tekur sér gjarnan skáldaleyfi (en ekki svo mikið skáldaleyfi), en þær eru yndislegar þessar stelpur. 

Af hverju er fullorðið fólk ekki iðnara við að tileinka sér fordómalausa hugsun barnsins?  Spyr ég eins og barn?  Hm...

[Ragnhildur Sverrisdóttir, 5.10.2007 kl. 09:08]

Vissulega eru þær frábærar, þótt ég hafi auðvitað áhyggjur af konum úti í bæ sem slengja sér í veggi í krúttköstum sínum.

Eins gott að slíkar konur eru skreytnar ýkjudósir