Fjöleignarhús

Fyrir svefninn í kvöld lásum við bókina Blómin á þakinu eftir Ingibjörgu Sigurðardóttur, um Gunnjónu gömlu sem flutti úr litla torfbænum sínum í risíbúð í Reykjavík. Hún saknaði sveitarinnar og byrjaði á að fylla íbúðina af blómum. Svo ákvað hún að nota aukaherbergið undir hænurnar sínar sjö og gerði matjurtagarð á svölunum.

Margrét þurfti að staldra lengi við hverja síðu, enda eru öll smáatriðin á myndunum hans Brians Pilkingtons yndisleg. En myndirnar eru samt dálítið dularfullar, því á flestum þeirra sjást aðeins 6 hænur, þótt Gunnjóna eigi 7. Margrét var með skýringar á reiðum höndum: Sjöunda hænan sem ekki sást á hlaðinu var klárlega sú sem var inni í baðstofu á næstu mynd og hana vantaði á myndina af hænunum í íbúðinni af því að þá hafði hún ákveðið að laumast í ból kattarins, sem var á myndinni.

Eftir laaaaaanga stund var þar komið lestrinum sem Gunnjóna gamla var að tyrfa þakið, enda vildi hún hafa torfþak á þessu húsi, rétt eins og gamla bænum í sveitinni. Á myndinni sést hún príla á bárujárnsþakinu. Hún býr sem sagt í risíbúð, í fjölbýlishúsi, þar sem klárlega er kjallari, 1. hæð, 2. hæð, 3. hæð og loks risið hennar Gunnjónu. Margrét hélt áfram að telja hænur, sem voru bara tvær, önnur á mæninum og hin í glugganum og leggja fram langar og ítarlegar tilgátur um hvar hinar fimm væru.

Elísabet horfði á gömlu konuna tyrfa þakið á fjölbýlishúsinu og spurði: "Þarf hún ekki að fá samþykki hjá hinu fólkinu í húsinu?"

Auðvitað er þetta hárrétt hjá litla lögfræðingnum. Gunnþóra má ekki ráðskast svona með sameignina.

Fyrir háttinn á morgun ætla ég að lesa fyrir hana lög um fjöleignarhús  nr. 26/1994.

Ég er viss um að Margrét hefur einhver ráð með að telja hænurnar í þeim bókmenntum líka.

Athugasemdir

[Kristín Björg Þorsteinsdóttir, 16.10.2007 kl. 08:24]

Frábær athugasemd hjá þeirri stuttu! Hún er efnilegur lögfræðingur og lætur greinilega ekki vaða yfir sig....

En þetta með nákvæmar myndir og texta: ég hef verið verkefnastjóri yfir nokkrum bókum sem US gefur út og þá er þetta gríðarlega mikilvægt; að myndir og texti fari saman því annars gleyma þau sem skiftir máli þegar þau sjá að ekki er samræmi. Ég man einhverntímann eftir einhverjum ís sem í texta var tvílitur en á myndinni bara hvítur - þetta olli hreinlega fjaðrafoki.

[Ragnhildur Sverrisdóttir, 16.10.2007 kl. 11:05]

Já, meira að segja með orðaforðann á hreinu: "Þarf hún ekki að fá samþykki....?" Ef hún hefði sagt "leita samþykkis" þá hefði ég sleppt því að blogga um þetta og farið með barnið til læknis

Myndskreytingar eru meirháttar mál. Margrét mín er afskaplega nákvæm og fer alltaf rækilega yfir hvern orm og snigil sem leynist á myndum í blöðum og bókum. Og spyr svo rækilega hvort þeir séu nefnir í texta.

[kristjana (IP-tala skráð) 16.10.2007 kl. 18:18]

Ikke dårligt segir maður upp á dönsku Margrét.  Það þýðir á íslensku mjög flott!

Hlakka til að hitta ykkur systurnar í Samkomuhúsinu í Ögri hvar áður fyrr var dansað á dönskum skóm.  Mamma Ragnhildur skýrir þetta betur út fyrir ykkur systrum.

kk.

Kristjana