Toys "R" óskrifandi

Er nokkuð óraunhæft að ætlast til að auglýsingar í íslenskum blöðum séu á íslensku?

Toys "R" Us auglýsir í dag í Fréttablaðinu og auglýsingin er hrein hörmung.

Yfirskriftin er Á LAUGADAGINN. Engin ástæða til að splæsa R-i á þann dag, greinilega.

Svo eru tilteknir opnunartímar, "Virkadaga" "Nema fimmtudaga", "laugadaga" og sunnudaga, sem ég skil nú ekkert í að ekki hafi verið hægt að skrifa vitlaust, svona til að hafa samræmi.

"Á FÖSTUDAGINN mun Teenage Mutant Ninja Turtles koma til okka ogo heilsa upp á  ig."

"Á FÖSTUDAGINN kl. 16.30 Í róttaálfurinn kemur í heimsókn í TOYS "R" US og spjallar við krakkana og syngur jafnvel nookkur lög. Það má enginn missa af  essu!"

Og ef fólk vill hringja, þá er auðvitað tiltekið TLF.: 55 00 800. Ekki símanúmer að sjálfsögðu, það er svo hallærislegt, heldur TLF.

Þá veit fólk hvert það á að hringja til að kvarta.

Einhvers staðar las ég að eigandi Rúmfatalagersins ræki þessa verslun. Það er alla vega líklegt að sá sem sér um bæklingana fyrir Rúmfatalagerinn hafi líka tekið að sér að gera auglýsingar fyrir leikfangaverslunina. Hérna í eina tíð voru þeir bæklingar alla vega hroðalegasta moðsuða af vondri íslensku og dönskuslettum sem sást. Einu vinni var dreifing bæklings meira að segja stöðvuð, af því að íslenski fáninn var þar notaður á hverri síðu í auglýsingaskyni og skrifað ofan í hann á mörgum stöðum "födselsdagspris" (á sömu kjarngóðu íslenskunni og ávallt einkenndi þá bæklinga).

Með örsmáu letri upp með hlið auglýsingarinnar frá Toys "R" Us segir: "Tilboð gildir til og með 20.10.2007 og aðeins í Smáratorg. Birt með fyrirvara um prentvillur og vöruframboð."

Já, birt með fyrirvara um prentvillur! Miðað við auglýsinguna er kannski varasamt að treysta því að allar LEGO vörur séu á hálfvirði, eins og þó stendur stórum stöfum? Restin af auglýsingunni er bull, svo kannski gildir hið sama um tilboðið.

Athugasemdir

[Jenný Anna Baldursdóttir, 19.10.2007 kl. 10:47]

Eru öngvir prófarkalesarar á Fréttablaðinu?

[Ragnhildur Sverrisdóttir, 19.10.2007 kl. 10:54]

Fuss, ég var nú að kíkja á þetta í Mogganum og þar var nánast sama sagan. Íslensku stafirnir höfðu að vísu skilað sér, en annað var jafn slæmt. Og ég VEIT að þar eru prófarkalesarar!

[bryndís þráinsdóttir (IP-tala skráð) 19.10.2007 kl. 11:18]

Sæl og bless, Ragnhildur. Eins og talað út frá mínu hjarta. Hafðu þakkir fyrir að vekja athygli á þessu. Meira segja unglingunum mínum blöskraði í gær þegar þær lásu auglýsinguna fyrir mig og voru steinhissa á því að svona lagað fengist birt í fjölmiðlum. Bestu Kv Bryndís 

[Eiður Svanberg (IP-tala skráð) 19.10.2007 kl. 12:54]

Það ætti að sekta fyrirtæki fyrir svona subbuskap.

[Hugarfluga, 19.10.2007 kl. 14:02]

Jahérnahér! Þvílíkir amatörar!

[Heimir Lárusson Fjeldsted, 19.10.2007 kl. 14:38]

Gráupplagt að hneykslast á þessu.

[Heiða B. Heiðars, 19.10.2007 kl. 14:51]

held að auglýsingarnar séu búnar til í Danmörku.... Gæti útskýrt vitleysurnar áður en þetta fór í prentun... restin er svo Fréttablaðsins

[Ingibjörg R Þengilsdóttir, 19.10.2007 kl. 15:41]

Sammála - hræðilegt að lesa þetta bull, en auglýsingarnar virkuðu, því sonur minn 9 ára gamall (reyndar í gær) bara varð að komast á þessa útsölu í "vinsælustu leikfangaverslun veraldar" eins og hann sagði, svo við fórum kl: 10 stundvíslega í gærmorgun og þvílíkt og annað eins!!! margföld biðröð og þeir sem höfðu komist inn að versla voru með þvílíkan helling af leikföngum að það hlýtur af hafa þurft kraftaverk til þess að koma þessu öllu inní venjulega bifreið.  Nú ég var svo heppin að ég gat talið son minn af því að bíða þarna og við fórum aftur heim.  Nú svo liðu ca 2 tímar og hann vildi endilega prufa aftur svo við fórum af stað og þá var röðin mjög stutt eins og hann sagði svo við létum okkur hafa það að fara inn í verslunina og þar var sko stuð, fólk hljóp þarna um hrópandi og kallandi og talandi í gsm síma og bara allt brjálað. sonurinn fjárfesti í dótakassa á 2499 krónur og plataði mig til að kaupa pakka af pókemonum á 1700 krónur og svo fórum við heim.  Þetta var heilmikið ævintýri, starfsfólkið talaði auðvitað dönsku og ensku að mestu leiti, þó var þarna einn íslendingur sem við rákumst á.  Og öryggisverðir um alla búð.

Jæja þetta var nú til gamans gert af því að drengurinn átti afmæli þennan dag, annars hefði ég ekki farið, og nú bara þarf ekkert að fara meira.

langaði bara svona að ganni að segja ykkur frá þessari lífsreynslu okkar.

góðar stundir

Ingibjörg  

[Baldur Már Pétursson (IP-tala skráð) 19.10.2007 kl. 17:14]

Ingibjörg, ég vona að þú hafir keypt ansi stórann Pókémon pakka á 1700 !

[Guðný Ósk (IP-tala skráð) 19.10.2007 kl. 20:29]

úfff.... það þarf sko ekkert endilega erlent fyrirtæki á Íslandi til að hafa lélega íslensku í auglýsingum eða öðru prentefni... Mér blöskrar nú oft vefsíða Morgunblaðsins - þar eru oft hroðalega pínlegar stafsetningarvillur...

 Þegar maður býr erlendis og vill fylgjast með því sem er í fréttum heima á klakanum góða - les ég daglega vef Moggans sem Á einhvern vegin að vera (alla vega í huganum)  besti prentmiðillinn, þá  verð ég að segja að þetta er ekki líðandi - ef að eru prófarkalesarar þar hmmm.... er þeir þá kannski danskir hehe...

 Nei allavega er vefsíða mbl ekki til fyrirmyndar... og ljóst að þeir sem eru prófarkalesarar fyrir síðuna lærðu ekki hjá sama kennara og við Kata í "denn"

 Kveðja frá Þýskalandi til ykkar allra, mæðgur - erum í raun nágrannar þegar að við á annaðborð erum heima ;-) þ.e. í Lálandi

[Hulda Bergrós Stefánsdóttir, 19.10.2007 kl. 22:58]

Við lifum í svo hröðu þjóðfélagi að eflaust fá prófarkarlesararnir ekki tíma til að lesa yfir. Nema þeir séu komnir með "erlenda" prófarkarlesara ?????

En kíki reglulega inn á þessa síðu og fylgist með sögum af systrum eru þær búnar að læra stafinn "R" ??

[Heiðar Reyr Ágústsson, 20.10.2007 kl. 00:25]

Prófarkalesarar á dagblöðum fara reyndar venjulega ekki yfir auglýsingar.

Þær eru á ábyrgð auglýsenda/auglýsingastofa.

[Sólveig Þóra (IP-tala skráð) 20.10.2007 kl. 00:42]

Hvað er að heimasíðunnni, ég spyr svona í ganni fyrirgefðu í gamni.

[Steinunn Ólína Þorsteinsdóttir, 20.10.2007 kl. 01:54]

Sjáiði litlu animölin! krúttlegt þegar þau eru að grasa sig!

[Ragnhildur Sverrisdóttir, 20.10.2007 kl. 12:06]

Síðast þegar ég vissi lásu prófarkalesarar á blöðunum, a.m.k. Mogganum, yfir tilbúnar síður. Blöðin geta ekki skýlt sér á bakvið auglýsingastofur, þegar hroðinn birtist á síðum þeirra.

[Benedikt Axelsson (IP-tala skráð) 20.10.2007 kl. 19:11]

Helgar ekki tilgangurinn meðalið í þessu efni sem öðrum?

Íslenskan er á hverfanda hveli. Gone with the wind var þýtt forðum daga Fokinn í roki af ágætum manni. Ég skal taka þátt í baráttunni fyrir íslenskri tungu en til gamans vil  ég benda þér á mynd af pabba þínum, sem ég teiknaði forðum daga í DV, þar sem hann rak út úr sér sína íslensku tungu enda menntamálaráðherra. Ég man ekki hvað ég lét hann segja en það hefur örugglega verið eitthvað gáfulegt.

[Ragnhildur Sverrisdóttir, 22.10.2007 kl. 00:20]

Systur hafa ekki enn lært R. Ég bíð spennt eftir næsta "staf vikunnar". Þetta skýrist allt á þriðjudag.

Guðný Ósk, Kata biður mig að skila að þú eigir hér boð í kaffisopa þegar þið kíkið heim frá útlandinu  Velkomin.

[Ragnhildur Sverrisdóttir, 22.10.2007 kl. 00:21]

Benedikt, ég man ekki eftir þessari mynd. Hvar get ég séð hana?

[Ibba Sig., 22.10.2007 kl. 14:36]

Er þetta efni frá upplýsingafulltrúanum Ómari sem þekktastur er fyrir að fronta Bechtel en er nú genginn í barndóm? Kannski er hann bara svona vanur að skrifa á útlensku að hann er búinn að gleyma gamla ylhýra.