Andrés

Margrét er heima hjá mér í dag. Hún er búin að vera með leiðindahósta undanfarið og nær ekki að hrista þetta af sér. Í dag ætlum við að slaka á og reyna að klára dæmið.

Hún er alsæl. Ég fór með Elísabetu í skólann klukkan 8 og þá kúrði Margrét í stóra rúminu. Þegar ég kom heim fór Kata í vinnuna. Ég ætlaði að skríða upp í, en Margrét ákvað þá að nóg væri komið af hangsi, settist fram með Andrés-möppu og las af miklum móð. Fljótlega vildi hún fá að horfa á mynd og fyrir valinu varð hin stórskrítna og skemmtilega franska teiknimynd Flóðið mikla. Ég svaf hana næstum alla af mér í sófanum, en Margrét ýtti við mér af og til, svo ég missti ekki af flottustu atriðunum.

Nú hrópar hún og kallar, vopnuð Andrés-möppunni enn á ný. Núna nennir hún ekki að skoða hana upp á eigin spýtur.

Gisp! Úakk! Gasp!

Ég er farin að lesa Andrés.

Athugasemdir

[Guðný Ósk (IP-tala skráð) 12.11.2007 kl. 13:31]

Hósti er leiðinlegur til lengdar, sér í lagi ef að heldur fyrir manni (og öðrum í húsinu) vöku á nóttunni

Hér eru nokkur ráð til að hjálpa við að losna úr viðjum geltsins - það fyrsta er kannski meira svona fullorðins þú veist, krökkum finnst það ekki það besta í heimi en..... sumum kannski - ykkar eru nú næstum alveg að verða fullorðnar finnst mér nú oft á tilsvörum og að vera tilbúnar að borða svið hmm.... já eiginlega ORÐNAR fullorðnar

Blandið saman

½ bolla af eplaediki og

½ bolla af vatni,

1 teskeið af cayenne pipar og

4 teskeiðum af hreinu, hráu hunangi.

Eða

Hitið í ofni sítrónu eða lauk (þar til að opnast)

Setjið 1 teskeið af heitum sítrónusafa eða heitum lauksafa og blandið við

½ teskeið af hreinu, hráu hunangi.

Takið þetta inn á hálftíma fresti og hóstinn hverfur.

Svo er líka tilvalið að skera ca. 1-2 cm af engiferrót og sjóða í vatni í u.þ.b. 10-15 mínútur og drekka svo sem te.

Bragðbætt með sítrónusafa og hreinu, hráu hunangi.

 Sakar ekki að prófa

Vonandi nær hún sér sem fyrst.

 Kveðja frá Þýskalandi

[Ragnhildur Sverrisdóttir, 12.11.2007 kl. 14:51]

Takk fyrir, Guðný Ósk. Margrét er að vísu óðum að jafna sig, en hins vegar hef ég tekið við af henni, svo ég nýti mér þetta