Giljagaur

13.12.2007 | 08:57

Giljagaur kom í nótt, hvernig sem hann fór nú að því í þessu hávaðaroki, blessaður karlinn. Ég hefði átt að verða vör við hann, ég svaf ekki mikið í þessum látum. Núna var vindáttin önnur en á mánudag, svo lokið sviptist til hálfs af heita pottinum. Það var reyndar ágætt að prufukeyra garðinn og allan búnað í honum í þessum hressilegu rokum, núna er alveg ljóst hvernig hlutirnir þurfa að vera til að þola þessar rosalegu sviptingar.

En aftur að Giljagaur: Systur voru búnar að rifja upp vísuna um hann eftir Jóhannes úr Kötlum. Þær eiga fallegu jólasveinabókina, sem Brian Pilkington myndskreytti. Miklir snillingar, Jóhannes og Brian.

Í kveðskapnum um Giljagaur er tekið fram, að hann vilji helst stela froðunni af mjólkinni. Núna freyðir auðvitað ekki lengur á heimilum þegar spenvolg mjólk bunar í fötu, en systur kunnu að sjálfsögðu ráð við því. Í þeirra huga er froða á mjólk fengin með froðustútnum á espressó-vélinni. Lítið mál að bjarga því Wink

Þær voru afskaplega lukkulegar í morgun með fingurstórar dúkkurnar, sem karlinn skildi eftir, þegar hann hafði troðið í sig smákökum, mandarínu og sleikt alla froðuna úr bollanum.

Elísabet, sem var eitthvað aum í gærkvöldi og með dálítinn hita, kvartaði sáran undan hálsbólgu í morgun og bar sig heldur illa. Við ákváðum að halda henni heima í dag. Sem þýðir að við verðum að fara mjög snemma að sækja Margréti.

Flokkur: Bloggar | Facebook

Athugasemdir

Það er sjúklega gaman að gefa í skóinn! Ég er búin að gera ráðstafanir til að fá Ara minn (þriggja ára í mars) til að gista hjá okkur eina nótt fyrir jól svo ég geti upplifað enn einu sinni spenninginn og gleðina við að fá í skóinn.

Ungdómurinn minn setur svosem skóinn út í glugga en...........

Kristín Björg Þorsteinsdóttir, 13.12.2007 kl. 09:30

Þarna varð mér alvarlega á í messunni...það er náttúrulega sjúklega gaman að sjá hvað JÓLASVEINNINN gefur í skóinn