Föst á náttfötum milli greina? Jólin, jólin...

Enn einn yndislegur dagur

Systur byrjuðu daginn á að skreppa í náttfatapartý til Mörtu Maríu vinkonu og nágranna og fjölskyldu hennar. Mikið fjör og foreldrum bannað að láta sjá sig fyrr en hálfum öðrum tíma síðar. Nágrannarnir á númer 2 hafa gert þetta áður og ég minntist þess að hafa mætt til þeirra í venjulegum fötum, en uppgötvað þá að allir aðrir voru í náttfötum. Við Kata ætluðum sko ekki að brenna okkur á þessu aftur, fórum í nátttreyjur, grófum upp náttbuxur (eða ég, Kata átti einhverjar nýlegar og flottar) fórum svo í náttsloppa og steðjuðum yfir klukkan hálf tólf. Gleði okkar var auðvitað ósvikin þegar við uppgötvuðum að við vorum einu foreldrarnir í náttfötum  Líklega hefur mig misminnt eitthvað, það kemur stundum fyrir  Svo eru kerlingar að kvarta sem mæta í svipuðum kjólum á árshátíð! Þær eru þó báðar klæddar miðað við tilefni!! Nágrannarnir kipptu sér auðvitað ekkert upp við klæðaburðinn, það fólk er farið að kannast þokkalega við okkur.

Eftir gott stopp á númer 2 fórum við heim, enn í náttfötunum að sjálfsögðu. Við dúðuðum okkur vel og vandlega og ókum upp í Öskjuhlíð. Þar örkuðum við um göngustíga allt þar til systur sáu kanínuspor sem þær ákváðu að rekja.

Því miður hafði þetta smávaxna kanínukvikindi farið um allan skóg, undir neðstu grein hér og milli þúfna þar. Systur fóru létt með að elta slóðina, Kata tróðst á milli greina og ég velti fyrir mér hversu neyðarlegt það yrði þegar björgunarsveit yrði kölluð út til að aðstoða konu sem sæti föst í greinum í Öskjuhlíð. Sú tilhugsun gaf mér kraft til að brjótast áfram.

Núna er allt með kyrrum kjörum í Logalandinu, systur leika með dót og mömmur lesa jólabækur. Önnur alla vega, hin bloggar eins og venjulega. Við ætlum að fá hangikjöt hjá tengdó í kvöld, svo jólasælan er ekki búin enn.

Athugasemdir

[Jenný Anna Baldursdóttir, 27.12.2007 kl. 11:39]

H'ihí, þið eruð krútt, uppátækjasöm sollis.

[Sigþóra Guðmundsdóttir, 27.12.2007 kl. 15:56]

Gleðilega jólasælu!

[J Friðrik Kárason (IP-tala skráð) 27.12.2007 kl. 16:16]

Gleðileg jól allar

Sé þig í anda föst í trjánum Klaufa mamma

Kveðja

JFK

[Ragnhildur Sverrisdóttir, 28.12.2007 kl. 00:16]

Takk, takk og gleðilega rest  

Ég var óskaplega fegin að komast af sjálfsdáðum úr þessum frumskógi. Ég sé mig líka í anda, þar sem björgunarlið hefði beitt klippum til að losa mig úr greinunum. Og á mbl.is hefði verið sagt frá öllu saman: "Konan var nokkuð þrekuð þegar að var komið. Hún var komin í sjálfheldu, með annan fótinn í kanínuholu en hinn var fastur í neðstu greinum grenitrés og gat hún enga björg sér veitt. Konan gat enga skýringu gefið á þessu feigðarflani. Lögreglan beinir þeim tilmælum til fólks að ætla sér ekki um of í jólagleðinni."

Jamm, svona hefði þetta getað farið. Ég fer varlega næst.