Skapsveiflur

Þegar ég rumskaði að morgni gamlársdags og byrjaði að bylta mér heyrðist sagt mjórri röddu: "Það er lítil stúlka á bakvið þig".  Elísabet hafði laumast upp í og ætlaði ekki að verða undir mér þegar ég sneri mér við

Við tókum því afskaplega rólega fram eftir degi, skruppum aðeins að kaupa í matinn og nokkur blys, en vorum mest heima. Systur skruppu í heimsókn til afa Torben og ömmu Möggu með mömmu sinni á meðan ég kláraði að sykurbrúna kartöflur, baka brauð og gera sveppasósu fyrir stórveisluna hjá Ásthildi systur um kvöldið. Þangað vorum við mættar rétt fyrir sjö, ásamt helftinni af stórfamilíunni mín megin. Ásthildur og Matthías eru slíkir gestgjafar að leitun er að öðru eins og til að toppa það er Matti "tertumaður" mikill, skýtur upp hverri stórtertunni á eftir annarri.

Ég hélt nú alveg vatni yfir Skaupinu  Mér finnst mjög mikill munur á því að gera grín að þjóðinni -góðlátlegt grín - en að hæðast ruddalega að henni. Sumt var vissulega fyndið, en mér fannst þessi Lost-tenging alveg glötuð. Ég varð samt ekki verulega pirruð fyrr en í blálokin, þá fannst mér alveg keyra um þverbak með myndbirtingum af ælandi unglingum, Kárahnjúkasprengingum og öðru miður lukkuðu, á meðan kvaldir útlendingar sungu Ísland er land þitt... Ég vil fá að vera "blissfully ignorant" á gamlárskvöld, hlæja að pólitíkusum og viðskiptaforkólfum, en ekki standa upp með óbragð í munni yfir því hvað allir Íslendingar eru mikil fífl - fyrir utan þá sem gerðu Skaupið, auðvitað, þeir eru voða, voða meðvitaðir

Nóg um það, ég lét þetta nú ekki pirra mig lengi og ætla ekki að láta það gerast aftur. Við ókum heim frá Ásthildi um tvöleytið og systur steinsofnuðu.

Dagurinn í dag hefur verið rólegur, við fórum ekkert út úr húsi fyrr en seinnipartinn, en þá vorum við búin að hafa nágranna í snarli og spjalli. Við drifum okkur að Ægisíðubrennunni klukkan sex, en forðuðum okkur aftur úr nístingskuldanum og rokinu hálftíma síðar. Enduðum heima í garði með nokkur blys og gos, sem ekki var hægt að koma í lóg á gamlársdag vegna veðurs.

Núna ætlum við að horfa á Önnu og skapsveiflurnar. Systur fá þá að sjá hvernig á EKKI að umturnast þegar skriðið er yfir á unglingsár. Eða hvernig á ekki að haga sér þótt Skaupið fari í taugarnar á manni

 

Athugasemdir

[Kolbrún Kolbeinsdóttir, 1.1.2008 kl. 23:22]

Já - alveg sammála með skaupið.  Það má alveg gera smá grín, en betra að hafa það góðlátlegt á gamlárskvöld.   Annars finnst mér bara alveg meiriháttar að RÚV sé með skaupið og fleira á netinu, það alveg bjargar okkur í útlöndunum!
Bestu  nýjárskveðjur,  kærar þakkir fyrir góð skrif á liðnum árum. 

[Jenný Anna Baldursdóttir, 2.1.2008 kl. 01:32]

Ég hef þann einstaka hæfileika að gleyma skaupinu um leið og ég er búin að horfa á það.  Það hefur oft komið sér vel.

Gleðilegt ár annars, aftur og nýbúin.

[Ragnhildur Sverrisdóttir, 2.1.2008 kl. 01:44]

Ég mun gleyma þessu sem fyrst. Ég vil standa upp með "goody feeling", búin að hlæja að hinu og þessu, í góðlátlegu gríni og án ruddaskapar.

Gleðilegt, gleðilegt ár