V er vinur um vetur

V er stafur vikunnar.

Margrét reið á vaðið.

Fyrsta myndin var af fallegri, brúnni kventösku. Veski

 

Næsta mynd var af tveimur litlum og brosmildum stelpum sem leiddust. Vinur.

 

Ég brá mér aðeins frá og Margrét sagðist ætla að lita fyrstu tvær myndirnar á meðan ég stússaði í eldhúsinu. Hún þyrfti að hugsa sig aðeins um. Þegar ég kom til baka var hún búin að teikna tvær myndir til viðbótar, án þess að þurfa að bera það undir kóng eða prest.

 

Mynd númer þrjú var af fallegum, rauðum hlut, sem stafaði af gulum bjarma. Vasaljós.

 

Fjórða og síðasta myndin var af hendi. Hún hreyfðist greinilega, því Margrét kann öll trikkin í Andrés-blöðunum og teiknaði því litlar, bognar línur við höndina, sem sýndu að hún var á iði. Sá sem átti hana var greinilega að veifa.

Elísabet teiknaði fyrst skælbrosandi stelpu í bláum bol og fjólubláu pilsi. Vala.

Á næstu mynd eru tvær stelpur, sem takast í hendur. Vertu sæl!

Þriðja myndin var meira en lítið flókin. Fyrst teiknaði listamaðurinn glugga og út um hann sást tungl á himni. Þetta var barnaherbergi með kommóðu, rúmi og skrifborði. Við skrifborðið sat stelpa og var að vinna á tölvuna sína. Hún hafði það ósköp notalegt þótt hún væri að bauka þetta fram eftir nóttu og var með konfektkassa á borðinu hjá sér. Myndin heitir: Vaka með konfektkassa. (Við Kata eigum mynd sem heitir "Seta í landslagi" og þetta heiti er ekkert ósvipað )

Listamaðurinn var gjörsamlega andlaus eftir þessa mynd, en notaði margreynda aðferð systur sinnar, stóð upp frá borðinu og gekk út að glugga. Kom svo æðandi til baka, teiknaði hluta af húsi og svo óteljandi korn að falla af himnum. Vetur.

Athugasemdir

[Ragnheiður , 17.1.2008 kl. 16:43]

Hehehe já andleysið entist sem betur fer ekki lengur en það.

[Blómið, 17.1.2008 kl. 19:09]

Alltaf jafngaman að lesa um stafablöðin  Það eru bara alltof fá eftir    En ég sá að listamennirnir fá þá bara að njóta sín í stærðfræðidæmunum  

[Linda Linnet Hilmarsdóttir, 17.1.2008 kl. 19:39]

kvitt-kvitt

[Kristín Björg Þorsteinsdóttir, 18.1.2008 kl. 07:04]

Þetta er ótrúlega frumlegt - Vaka með konfektkassa

[Guðrún Emilía Guðnadóttir, 18.1.2008 kl. 11:36]

Það er nú ekki dónalegt að vaka með konfektkassa, nammý nam.
alltaf jafn frábærar.

[Ragnhildur Sverrisdóttir, 18.1.2008 kl. 11:53]

Ég er alveg sammála þessu með frumlegheitin, enda hefur Elísabet EKKI fyrirmynd innan veggja heimilisins að andvökunóttum með konfektkassa. Eða kannski smá, svona um jólin.... mig rámar eitthvað í Nóa konfekt og Ösku eftir Yrsu Sigurðar.... en var Elísabet ekki örugglega sofandi þá??