Þristur minn góður

Systur voru sprækar þegar við gengum í skólann í morgun. Þær hafa dálitlar áhyggjur af smáfuglunum þessa dagana, þegar allt er hulið snjó. Við höfum gefið þeim hérna fyrir framan húsið og þær hafa sífellt áhyggjur af að þeir fái ekki nóg. "Við verðum að gefa núna," sagði Elísabet þegar við komum heim eftir skólann, "það er svo sætur þristur í trénu núna."

Þristur. Þröstur. Hvaða máli skiptir einn sérhljóði svosem?

Eftir skóla lásu þær af kappi og fóru svo með Töru og Mörtu Maríu í fimleika. Thelma Törumamma sá um skutlið í dag. Algjör snilld að skipta þessu svona, eins og ég þreytist ekki á að dásama.

Síðdegis, á meðan þær voru í fimleikum, þóttist ég ætla að koma einhverju í verk hérna heima, en fréttir af borgarmálum slógu mig alveg út af laginu. Ég var í sambandi við Möggu systur, hlustaði á útvarp og horfði á sjónvarp, jafn gapandi hissa og restin af borgarbúum.

Eftir kvöldmat skrapp ég með systur í afmæliskaffi hjá Báru guðmóður, á meðan Kata vann heima. Systur voru fljótar að sofna þegar við komum heim, en okkur Kötu kom ekki til hugar að fara að sofa beint ofan í borgarmálin.

Svei mér þá.

Best að einbeita sér að því sem mestu máli skiptir í þessari borg: Á morgun er stafablað.

Athugasemdir

[Ragnheiður , 21.1.2008 kl. 23:50]

Þristur hehehe ...

Stafablað er merkilegra í Reykjavíkurborg en hitt þarna..það segi ég satt.

[Ragnhildur Sverrisdóttir, 22.1.2008 kl. 10:16]

Ekkert stafablað í dag. Systur fóru ekki í skólann af því að ég trúði því að það væri ofsaveður í Reykjavík. Stupid me.