Tertuhelgi

Systur voru alsælar með afmælisboðið í Smáralind. Stelpuhópurinn fékk pizzur, köku (já, hina einu sönnu) og ís og svo klifruðu þær upp um alla veggi sleitulaust. Allar vinkonurnar gáfu þeim fínar gjafir og þær voru alveg í skýjunum þegar þær dunduðu sér með dótið í gær og í morgun. Kata gat tekið stutt vídeó á myndavélina sína þegar systur voru að skreyta tertuna og hún getur áreiðanlega fundið út úr því með mér hvernig á að setja það inn á síðuna.

Við fórum snemma út í morgun, hittum Addý og Báru í brunch á 101 og svo fóru systur í afmæli til Sigurlaugar bekkjarsystur. Sama hamingjan í því afmæli og þeirra eigin, sýndist mér. Við Kata röltum eftir þeim klukkan þrjú og klukkutíma síðar vorum við mættar í fermingu hjá Elínu Rósu. Við erum því rækilega úttroðnar af tertum og pizzum eftir þessa helgi

Páskafríið er byrjað í skólanum, en systur fara í frístundaheimilið í fyrramálið. Mér sýnist prógrammið þar mjög skemmtilegt næstu daga, hópurinn fer á skauta á morgun og í keilu á þriðjudag. Þær eru spenntar og ekki baun svekktar að vera ekki í fríi alla daga. Þær fá líka að hjóla í frístundaheimilið á morgun, ég lofaði því víst í einhverju bríaríi fyrr í dag.

 

Athugasemdir

[Edda Agnarsdóttir, 17.3.2008 kl. 01:00]

Bríarí? þetta notaði mamma mín og það eru ekki margir sem þekkja þetta orð. Hvaðan kemur það og hvað er formlega þýðingin?

Ég hef heyrt þetta notað eins og vitleysa - þetta er agjört bríarí! er það ekki til?

[Jóna Kolbrún Garðarsdóttir, 17.3.2008 kl. 01:30]

er bríarí = bjartsýniskast?   Ég kannast líka vel við þetta orð

[Katrín Frímannsdóttir (IP-tala skráð) 17.3.2008 kl. 07:54]

Þetta orð þekki ég vel í þeirri merkingu sem þú notar það; fljórfærni, án þess að hugsa um afleiðingar, án þess að hugsa. Mamma mín, sem var skólasystir pabba þíns á Ísafirði, notar þetta orð oft. Hjartans þakkir fyrir yndislegt blogg.

[Ragnhildur Sverrisdóttir, 17.3.2008 kl. 10:14]

Rétt, Katrín, svona notar fólk þetta alla vega á mínu bernskuheimili: Í fljótfærni, hugsunarleysi, kæruleysi...

Ég man ekki til þess að þetta hafi verið notað eins og þú segir, Edda, þ.e. að eitthvað sé algjört bríarí í merkingunni vitleysa.

Ég googlaði þetta auðvitað, fyrst bloggið mitt er orðið málfarsþáttur og þar sá ég að margir nota þetta eins og ég, en það er líka til í dæminu að þetta sé notað í merkingunni vitleysa. "Þetta er tómt svindl og bríarí" skrifar einhver, en sá næsti segist hafa varpað einhverri hugmynd fram "í bríarí".

Svo er auðvitað vit að kíkja í orðabók. Í nýrri íslenskri segir: "óskipulegt hátterni, rælni, tilraunamennska, umhugsunarlítil athöfn, uppátæki af litlu viti..."

Dæmi eru gefin um "það datt í mig svona í  bríaríi" en líka "tókum upp á ýmsu bríaríi", svo í síðara dæminu er nú vitleysan þín komin, Edda