Framkvæmdin

Rétt í þessu var sýnt úr næsta þætti af CSI. Þar er sagt að einhver hafi tekið að sér að vera "Judge, jury and executioner."

Þetta var þýtt: "Dómari, kviðdómur og ....

haldið ykkur fast....

"framkvæmdaaðili aftökunnar"

Guð minn góður, er ekki hægt að sleppa svona stofnanamáli og nota gamla og góða orðið: Böðull?

Held að "framkvæmdaaðili þýðingarinnar" ætti að vanda sig betur næst.

Athugasemdir

[Garún, 27.3.2008 kl. 23:15]

hahahahaha

[Ragnheiður , 27.3.2008 kl. 23:20]

Hahahahaha ég missti af þessu.

[Jenný Anna Baldursdóttir, 28.3.2008 kl. 00:04]

Hahahaha, eða aftökufrömuðurinn.  Ég dey.  Fyrir nokkrum árum gekk ljósum logum á Sjá 1 þýðingin "kviðurinn" í stað orðsins kviðdómur.  Ég var uþb farin til að myrða einhvern þarna uppfrá.

Jess, en ég gerði það ekki, annars væri ég væntanlega að bíða eftir framkvæmdaaðila aftökunnar.

Góða nótt.

[Lilja Guðrún Þorvaldsdóttir, 28.3.2008 kl. 02:09]

HAhahahahahahaa, ég verð að sjá endursýninguna, það er þess virði, til að sjá  afrek framkæmdaaðila aftökunnar.  

  Um daginn sá ég, þátt þar sem byssubardagi átti sér stað milli tveggja bófaflokka, allt  í einu þagnaði skothríðin hjá foringjanum sem hvíslaði til félaga síns: -  þarf að skipta um magasín,  vantar nýtt magasin. -- Þýðingin var :  Þarf að skipta um stórmarkað - veistu um nýjan stórmarkað.

[Ragnhildur Sverrisdóttir, 28.3.2008 kl. 07:36]

Hahahaha!

Stundum horfa þýðendur ekkert á myndirnar, það er ljóst.

Einu sinni fór ég á barnamynd. Í upphafi hennar voru álfar að stríða konu, taka þvottinn hennar og eitthvað slíkt. Hún var pirruð og muldraði í barm sér: Bloody fairies!

Þýðingin í þessari ágætu barnamynd?

"Bölvaðir hommarnir"!!!

[Elín Sigríður Grétarsdóttir, 28.3.2008 kl. 09:47]

mér finnst gaman að vera framkvæmdaraðili lesturs að blogginu þínu

[Olla (IP-tala skráð) 28.3.2008 kl. 10:51]

Hahaha! Hvaða meðal-Jón hefur ekki fallið í gildru beinnar þýðingar af erlendri tungu yfir á ástkært móðurmálið? EN ekki löggiltur atvinnu-framkvæmdaraðili þýðingar á þáttum og kvikmyndum! Det bara gör inte! (lesist sem - það bara gengur ekki).