Cirka sandalar

29.3.2008 | 13:18

Kata er komin heim, heilu og höldnu. Systur fengu að fara með mér að sækja hana í gærkvöldi og þótti það ógurlega spennandi.

Þær voru alsælar að fá gyllta sumarsandala frá Kaupmannahöfn. Ég lýsti líka mikilli hrifningu og spurði: "Á ég ekki líka að fá mér svona gyllta sandala?"

Það sló þögn á þær systur.

Svo sagði Margrét, mjög varfærnislega og vildi greinilega ekki særa mig: "Ja, svona sirk-a-bát."

OK, svo þeim finnst ég ekki passa í gyllta sandala. Ég get alveg lifað með því.

Flokkur: Bloggar | Facebook

Athugasemdir

Hverslags bull er þetta, í þér Jón Arnar! Auðvitað, átt þú Ragnhildur, að fá gyllta sandala, ef þig langar yfir höfuð í, gyllta sandala. - Ég á gylltar mokkasínur - frá Ilse Jakobsen Hornbæk, og ég er orðin 50++. Að vísu hef ég voða lítið gengið í þeim hér heima, finnst miklu flottara að sjá aðrar konur í svona skóm, en mig sjálfa. En flottir eru þeir.

Lilja Guðrún Þorvaldsdóttir, 30.3.2008 kl. 00:40

Verð nú bara að segja að fólk á bara að klæða sig og skæða eins og það vill. Sagði eitthvað svipað við kallinn þegar ég keypti mér blómaskó á Spáni um árið. Notaði þá aldrei hér heima, en naut þeirra í botn á meðan tækifæri gafst á suðrænum slóðum.

Sigrún (IP-tala skráð) 30.3.2008 kl. 00:49

Sko, það blundar alls ekki í mér nein þrá eftir gylltum sandölum. Það er leitun á byggðu bóli að konu sem er gjarnari á að klæðast bara gallabuxum og svörtum skóm, kannski brúnum ef ég ætla virkilega að vera lífleg í fatavali. Þetta vita systur, sem hafa meira að segja oft spurt mig út í þetta, sérstaklega þegar þær voru sjálfar á bleika og gyllta tímabilinu.

Gylltar mokkasínur og blómaskór eru til fyrirmyndar -bara ekki á mínum tám