Sveppahaus

2.4.2008 | 13:13

Eftir allt Vespu-talið á heimilinu undanfarið og áhyggjur dætranna af því að geta ekki brunað með mér um götur á tryllitækinu, þá áttuðum við okkur allt í einu á því í gær, að Vespa er aldeilis óþörf.

Við eigum allar reiðhjól.

Ég sé fram á miklu, miklu erfiðara sumar en á meðan Vespu-draumurinn var á lífi.

Elísabet er harðákveðin að vera mjög dugleg að hjóla með mér í sumar. Hún er líka búin að ná fullkomnun í hjólreiðalistinni og enginn eftirbátur systur sinnar lengur. Svo fengu þær þessa fínu hjálma í afmælisgjöf, svo þær eru færar í flestan sjó.

Ég ætti kannski að biðja mömmu og pabba að gefa mér nýjan hjálm? Það er svosem ekkert að hjálminum mínum, fyrir utan það litla smáatriði að þegar ég er með hann lít ég út eins og eitthvað sem á ekki að vera á ferðinni innan um almennilegt fólk. Lítil börn gráta, háaldrað fólk lítur undan því þótt það hafi séð ýmislegt á langri ævi þá er þessi sjón skelfilegri en það allt saman.

Af hverju þurfa þessir hjálmar að vera eins og ofvaxnir sveppir?

Á Vespu hefði ég getað verið með lokaðan hjálm með reyklituðu gleri. Það hefði verið kúl. Svoleiðis hjálmur á reiðhjóli er hins vegar ekki til að bæta mannorðið.

Flokkur: Bloggar | Facebook

Athugasemdir

Ég garga úr hlátri. Sko af tilhugsunni um þig með hjálminn. Ástæðan fyrir því Ragnhildur mín, að ég hjóla ekki, er bölvaður hjálmurinn. Hann er fínn á börnum en glataður á þroskuðu fólki.

Ég er enn í kasti

Jenný Anna Baldursdóttir, 2.4.2008 kl. 13:24

Dæturnar eru svo miklir forvarnafasistar að það er útilokað að sleppa í hjólatúr hjálmlaus (sorrý, Kristín B. Þorsteins, en sumar forvarnir eru bara ekki mannlegar, svei mér þá!)

Það allra, allra klæðilegasta við hjálminn er bandið undir hökuna, sem hverfur inn á milli höku 1 og höku 2. Við eyrum klofnar bandið og myndar fagran þríhyrning, sem dregur athygli að eyrunum á þann hátt að enginn ber sitt barr.

Kristín, reddaðu þessu! Fínni höfuðföt, takk fyrir!

Ragnhildur Sverrisdóttir, 2.4.2008 kl. 13:39

Hehehehe - fyndin kona þú ert mikilu, miklu, miklu fallegri með ljótan hjálm en brotinn haus. Húrra fyrir forvararfasistunum þínum!!!!

Vertu bara viss um að hjálmurinn þinn sé ekki of gamall þá gerir hann lítið gagn ef óhapp verður. Hann má vera 5 ára frá framleiðslu degi og 3ja ára frá kaupdegi. Á að vera merktur innaní.

Kristín Björg Þorsteinsdóttir, 2.4.2008 kl. 14:50

Nei, heyrðu mig nú! Hér er ég að fara að hjóla til að spara bensínpeninga og þá á ég að kaupa nýjan hjálm! Er ekki allt í lagi??

Kíki kannski inn í hjálminn fyrir siðasakir. En passa mig að gera það gleraugnalaus.

Ragnhildur Sverrisdóttir, 2.4.2008 kl. 14:58