Broddgöltur

Síðdegis er bekkjarskemmtun hjá systrum í Fossvogsskóla. Þær ætla að troða upp ásamt bekkjarfélögunum, alla vega lesa upp. Þær eru mjög spenntar og mæður ekki síður.

Í gærkvöldi hófst undirbúningurinn. Þær fóru í bað eftir fimleikana og svo sátum við Kata sveittar við að setja ótal litlar fléttur í þær. Flétturnar sofnuðu þær sælar með og verða með í dag, en fyrir skemmtunina verða þær teknar úr og liðirnir fá að njóta sín. Vonandi sofna þær ekki í miðjum klíðum, hárgreiðslan tók allt of langan tíma og þær sofnuðu ekki fyrr en rúmlega 9.

Við eigum að koma með hollar og góðar veitingar á hlaðborð og systur eru ákveðnar í að hjálpa mér við undirbúninginn. Við eigum því eftir að eyða síðdeginu við að búa til ávaxta-broddgölt.

Á morgun ætla þær að taka með sér heitt kakó í brúsa, þá fer bekkurinn þeirra nefnilega í leiðangur um dalinn og nestið verður borðað úti. Þær ætla að sjálfsögðu að stýra nestisgerðinni, eins og öðru.

Athugasemdir

[Jenný Anna Baldursdóttir, 3.4.2008 kl. 11:26]

Hvað er ávaxta-broddgöltur?  Ég finn það á mér að það er eitthvað sem hefur sárlega vantað í líf mitt lengi

[Ragnhildur Sverrisdóttir, 3.4.2008 kl. 11:37]

Ávaxta-broddgöltur er skotheld aðferð til að koma ávöxtum í krakkaorma.

Fyrst sker maður melónu í tvennt, tekur innan úr henni og sker í bita. Þræðir svo melónubita, vínber og mandarínubáta upp á pinna, stingur þeim í melónuhelminginn og PRESTÓ: Ávaxta-broddgöltur!

[Kristín Björg Þorsteinsdóttir, 3.4.2008 kl. 11:56]

Það er alltaf gaman að fara á skólaskemmtanir/kynningar. Er búin að að fara á þær all margar og finnst alltaf gaman. Gaman að sjá hvað krakkarnir eru að gera og hitta aðra foreldra.

Ég var á einni slíkri á mánudaginn var. Þá voru 7undu bekkingar að kynna verkefni sem þau höfðu unnið með power point í landafræði. Veitingar voru við hæfi því mín var í 3ja manna hóp sem kynnti Bretland og að sjálfsögðu útbjuggum við mæðgur þarlendar veitingar - nýrnapæ, fisk og franskar - nei ekki alveg svo stórkallalegt en við buðum upp á After eight og svo vorum við með tekex með osti og sultu. Vantaði bara te-ketilinn.

Þið mæður eigið enn fleiri dásamlega daga í vændum með stelpunum ykkar - um að gera að njóta

[Ragnheiður , 3.4.2008 kl. 15:06]

Ávaxta broddgöltur lítur afar vel út og er áreiðanlega líka ansi flottur útlits. Þetta þarf ég að prófa  Hvaða plebbar erum við Jenný eiginlega að kannast ekki við svona ?

[hm (IP-tala skráð) 3.4.2008 kl. 20:30]

Sit hér og flissa alveg geegt við tilhugsunina um ykkur sitjandi með hjálma á skemmtuninni, ekki að útlitinu á ykkur heldur  jæja ókei flissa að því ef þið sætuð glerfínar með sveppahjálma :) sorrý mér nefnilega finnst þetta alveg mergjuð lýsingin hjá þér með hjálmana. En það er rétt sem lesandi þinn segir að betra vera sveppur á hjóli en........ Vona að skemmtunin hafi gengið að óskum. (til að ná vespu á heimilið gætirðu náttúrulega gefið konunni vespuna og svo bara fengið það "lánað" í tíma og ótíma :)

[Ragnhildur Sverrisdóttir, 4.4.2008 kl. 16:17]

Uss, Ragnheiður, ég er nú eiginlega alveg í sjokki að uppgötva að heimsdömurnar tvær borða bara vínberin beint af klasanum, halda á eplum í lófanum og bíta í, flysji mandarínur í báta og stinga beint upp í sig....ó, horror, ég get bara ekki haldið áfram!

Þetta er reyndar þrælsniðug aðferð til að koma ávöxtum í krúttin. Þau voru misjafnlega morbid þegar þau voru að kroppa af broddgeltinum molana -sum fóru beint í vínberjaaugum!