Stupidos!

Systur skrópuðu á fótboltaæfingu í dag. Ég verð að viðurkenna að ég átti hugmyndina, veðrið var svo fallegt að mér fannst nær lagi að ólmast í fótbolta á pallinum en fara inn í hús. Ég er fegin núna, þegar farið er að snjóa! Hvað á það á þýða?

Tara kom með systrum heim, brá sér svo af bæ og kom aftur klukkutíma síðar. Þær eru óaðskiljanlegar, þessi krútt. Fjórða skyttan, á númer 2, er enn með hita, en nær sér vonandi fljótt. Hennar er sárt saknað.

Í dag var okkur Kötu kláru kippt niður á jörðina. OK, það hefur nú aðallega verið ég sem hef mært Kötu fyrir skynsemi og almenn fullorðinsheit, en hún hefur oftast átt inni fyrir því. Í alvöru.

Undanfarna daga hefur hún verið hreint að drepast í herðunum, vöðvabólgan alveg að ganga frá henni og þessu hefur fylgt mikill höfuðverkur. Henni var alveg hætt að litast á blikuna. Og við áttum margar gáfulegar samræður, þar sem við reyndum að kryfja málið. "Ætli ég hafi sofið svona vitlaust í nótt?" velti hún fyrir sér og ég lagði eitthvað gáfulegt til málanna um kodda, einn eða tvo og svo framvegis, reyndi að nudda aumar axlirnar á henni og var alveg jafn bit á þessum óvenjulegu verkjum og hún.

Þótt við værum á tímabili jafn vitlausar, þá sá hún ljósið á undan mér.

Hún lenti í mjög hörðum árekstri fyrir skömmu. Ætli geti nokkuð verið að helaumar axlir og heiftarlegur höfuðverkur eigi uppruna sinn að rekja þangað?

Döh!

Athugasemdir

[Lilja Guðrún Þorvaldsdóttir, 9.4.2008 kl. 02:17]

Ó,já, var keyrt aftan á hana!  Viplas áverki kemur ekki fram strax, það getur liðið þó nokkur tími.  En þú ættir að drífa hana strx í myndatöku og til læknis.  Og svo í sjúkraþjálfun áður en það versnar meir.

[Ragnhildur Sverrisdóttir, 9.4.2008 kl. 09:35]

Þetta verður rannsakað í þaula, eigi síðar en strax!

[Ragnheiður , 9.4.2008 kl. 09:53]

Já drífa sig bara. Ég fékk svona eftir miklu minni árekstur en Kata lenti í , málið hjá mér var að ég var að horfa til vinstri þegar ekið var aftan á mig.

Þetta er ógurlega vont.

Batnikveðjur

[Ragnhildur Sverrisdóttir, 9.4.2008 kl. 10:33]

Það var reyndar ekki ekið aftan á hana, heldur á hægra framhornið. Kata kastaðist til vinstri, eins og sást af smávægilegum áverkum á vinstri hendi og ofan við vinstra hné. Hún hefur því fengið svona svipað högg og þú, Ragnheiður, höfuðið farið út á hlið. Við leysum málið núna, þegar við erum loksins búnar að kveikja á perunni.

[Helga Magnúsdóttir, 9.4.2008 kl. 13:53]

Vonandi fær Kata bót meina sinna sem allra fyrst. Axlir og háls geta farið illa í árekstrum.

[Kristín Björg Þorsteinsdóttir, 9.4.2008 kl. 16:40]

ÆÆÆ - konu kvölin. Það er mjög líklegt að bílslysið sé orsökin.

[Olla (IP-tala skráð) 10.4.2008 kl. 01:38]

Ég segi nú bara .... "it læs in ðí æs opsters"! (lesist: það liggur í augum uppi). Kata þarf á daglegu olíunuddi að halda og heitum bökstrum - Ragnhildur, láta hendur standa fram úr ermum.

[Linda Linnet Hilmarsdóttir, 10.4.2008 kl. 14:35]

Æææ ekki er þetta gott,áverkar koma oftast eftir á,en eru þó mis vondir,en ég vona að hún fá meðferð við þennan sársauka sem fyrst,knús knús og batakveðjur