Á bloggina

Systur fóru á Valsæfingu í dag og höfðu legghlífarnar innan undir sokkunum, í fyrsta skipti. Legghlífarnar eru mjög flottar, svartar og silfraðar, en nú voru þær í splunkunýjum sokkum og féllust á að hafa þá yfir.

Af æfingu brunuðum við beint til Afa Ís og Ömmu Deddu, enda vissum við að þau voru með stóra, ósnerta súkkulaðiköku. Systur borðuðu hana hálfa, svei mér þá.

Næst var það Kringlan, að kaupa afmælisgjafir fyrir tvöfalt afmæli sem þær fara í á morgun. Svo brustu allir varnargarðar hjá mér og þrátt fyrir kokhreystina hér á blogginu fóru systur á McDonald's. Já, já, ég veit....

Þegar við komum heim ákváðu þær að skrifa kveðju til mömmu sinnar "á bloggina". Það tók laaaangan tíma. Margrét var sneggri og gerði fáar og ofurkrúttlegar villur. Hún fann víst ekkert vaff nema það tvöfalda og fannst það líka miklu flottara. Elísabet var miklu lengur, en hún sýndi og sannaði hvað hún getur skrifað rétt þegar hún vandar sig mikið.

Hérna eru kveðjurnar til þín, Kata ;)

ELSKU MAMMA. ÉG WONA AÐ ÞÉR LÍÐI WEL Í LONDON KNÚS OG KOSSAR  FRÁ MARGRÉTI  J

ELSKU MAMMA ÉG HLAKKA TIL ÞEGAR ÞÚ KEMUR HEIM. GVEÐJA ELÍSABET J

Athugasemdir

[Jenný Anna Baldursdóttir, 22.4.2008 kl. 20:11]

Jesúsamín hvað þetta er yndislegt.  Búhú

[Ragnhildur Sverrisdóttir, 22.4.2008 kl. 20:52]

Nei, GVEÐJA, sjáðu til ;) Reyndar ætlaði hún líka að skrifa "gemur heim", en systir hennar kom í veg fyrir það.

[Elín Sigríður Grétarsdóttir, 22.4.2008 kl. 21:02]

og auðvitað skrifa Margrét með twöföldu waffi til að hafa útlenskan hreim,er ekki mamma í enskumælandi landi?

[Ragnhildur Sverrisdóttir, 22.4.2008 kl. 21:08]

Það má wel wera ;)

[Ragnheiður , 22.4.2008 kl. 21:46]

Mestu krúttin en aumingja mamman sem er í útlandinu og les, þar hafa örugglega verið einhverjar ræskingar og svoleiðis

[Linda Linnet Hilmarsdóttir, 23.4.2008 kl. 10:42]

[Dabbaa (IP-tala skráð) 23.4.2008 kl. 10:43]

ÆÆJjjhii krúttin :D Yndisleg svona barnsleg einlægni

[hm (IP-tala skráð) 23.4.2008 kl. 12:43]

Ekki amalegt að fá svona dásamlegar kveðjur frá prinsessunum

[Olla (IP-tala skráð) 23.4.2008 kl. 13:24]

Æji þær eru svo mikla dúllur! Það er einmitt þetta sem bræðir hjartað. Geymi öll litlu bréfin og skilaboðin til mín sem voru skilin eftir á eldhúsborðinu um ferðir unganna, misvel stafsett og skiljanleg. Og reyndar bréfin til jólasveinsins og tannálfsins líka, ef út í það er farið  Gveðja, Olla.

[Forvitna blaðakonan, 26.4.2008 kl. 00:29]

Mikiðfinnst mér það gott hjá ykkur Kötu að ala þær upp í Vals. Sjálf bjó ég í Víkingshverfinu en var í Val. Ég er ævinlega þakklát fyrir árin í handboltanum og spilaði í öllum flokkum og vann til 13 medalía; geri aðrir betur. En það var nú á gullaldraárum Valskvenna.

Mig munaði ekki mikið um að taka strætó Bústaðherfi-hraðferð niður að Miklatorgi og tölta þetta síðan í Valsheimilið. Gott hjá Kötu Valskonu að hugsa heim í heiðardalinn; og ef þær hafa hæfileika móðurinnar og keppnisskap þá þurfið þið mömmur ekki að örvænta.