Læknirinn með vatnið

Við morgunverðarborðið voru systur að tala um hjátrú. Svartir kettir, stigar, bakpokar í húsi óléttrar konu, skörðóttur bolli í húsi óléttrar konu og fleira og fleira. Þær vildu sífellt fá fleiri dæmi um hjátrú, þar til við Kata vorum gjörsamlega þurrausnar.

Svo sneru þær sér að málsháttum og orðatiltækjum.

Margrét átti málshátt dagsins, sem hún viðurkenndi að hún ætti erfitt með að skilja: "Maður þarf ekki alltaf að fara til læknis til að ná í vatn."

Ég veit ekki hvernig við Kata komumst hjá því að springa úr hlátri. Ofurmannlegar, svei mér þá.

Elísabet áttaði sig á að eitthvað var undarlegt við þetta. "Ég held að maður eigi að segja læksins, Margrét," sagði hún og systir hennar viðurkenndi villuna.

Svo ræddum við aðeins um réttu útgáfuna og hvað það þýddi að fara yfir lækinn að sækja vatn.

Elísabet sagðist líka kunna málshátt. Hún þurfti að hugsa sig um lengi, lengi, en loksins kom þetta: "Ekki er allt gult sem glóir."

Við fórum aðeins í gegnum þetta og þegar hún var búin að átta sig á að verið væri að tala um gull en ekki eitthvað gult, þá var eftirleikurinn auðveldur.

Einu sinni voru þættir um Bibbu á Brávallagötunni, sem sneri öllum orðatiltækjum og málsháttum á hvolf. Handritshöfundarnir hafa líklega verið 7 ára.

Athugasemdir

[Jenný Anna Baldursdóttir, 1.5.2008 kl. 12:17]

Bibban var góð en stelpurnar eru brilljant.´

Gleðilegan 1. maí.

Sumir þurfa að fara til læknis og ná í vatn reyndar, sko lífsvatnið.  Hm... ég er svo djúp, svo djúp.

[J Friðrik karason (IP-tala skráð) 1.5.2008 kl. 13:44]

Sælar allar

Það vann maður með mer sem var snillingur i malshattum

Þegar ein baran ris þa er önnur stök

Sjaldan launar kalfur ofbeldið

kv

JFK

[Svala Erlendsdóttir, 1.5.2008 kl. 18:52]

hehe, þið eruð frábærar. Hér er einn.

Svo lengist lærið sem lífið...

7 ára fannst mér ekkert skrítið við þennann því að sjálfsögðu lengist lærið á manni eftir því sem maður eldist....

en átti að vera

Svo lengi lærir sem lifir... 

[Ragnhildur Sverrisdóttir, 1.5.2008 kl. 21:39]

Frábærir málshættir, takk fyrir það

[Lilja Guðrún Þorvaldsdóttir, 3.5.2008 kl. 02:03]

Snillingar eru þær litlu 7 ára hnáturnar þínar Ragnhildur.  Hugsaðu þér bara, að eins og Bibba var mikil snilld, fyrir allar sínar málvillur, og þágufallssýki, þá urðu þeir alltaf fleiri og fleir, sem sáu ekkert, athugavert, við þennan talsmáta, gátu ekki hlegið að neinum málvillum afþví að þeir heyrðu þær ekki, og málshættina og orðatiltækin vitlausu, er fólk löngu hætt að þekkja. - Og sáu því ekkert fyndið við þau.  -  En stelpurnar þína 7 ára þekkja þessi orðatiltæki afþví að það er talað við þær eins og vitibornar manneskjur.   Það er mjög gaman að fylgjast með pistlunum þínum, þakka þér fyrir alla þessa skemmtilegu pistla.

[gú gu (IP-tala skráð) 4.5.2008 kl. 17:32]

Ég held að einum íslenskumanninum hafi orðið á að segja læksins í eignarfalli og hafi verið kallaður G. lækur eftir það.  Er ekki eignarfallið lækjar, kv. ónefndur aðdáandi í kvenkyni sem les reglulega bloggið þitt.

[Ragnhildur Sverrisdóttir, 7.5.2008 kl. 00:19]

Mikið rétt, þessum ágæta manni varð svo mikið um að hann hætti með reglulega íslenskupistla í útvarpi ! Þess vegna fannst mér "leiðrétting" Elísabetar extra góð