Tillaga um að fara að vinna

Í dag lagði borgarstjóri fram tillögu um að sviðsstjórum ÍTR og menntasviðs verði falið að leiða vinnu við gerð tillagna um hvernig leysa megi manneklu og aðstöðuvanda frístundaheimila í borginni.

Tillagan verður tekin til afgreiðslu á næsta fundi borgarráðs að viku liðinni.

Mér er satt best að segja hlýtt til  borgarstjóra og hef haft trú á röggsemi hennar. En mikið óskaplega varð mér illa  við þegar ég heyrði þessa frétt. Er þetta ekki grín?? Að í næstu viku verði afgreidd tillaga um að sviðsstjórarnir leiði vinnu við gerð tillagna?? Ég var nú svo barnaleg að halda að akkúrat núna, þegar 1400 börn bíða eftir vistun á frístundaheimilum, væri verið að vinna alla þá vinnu sem nauðsynleg væri til að leysa málið, hvort sem væri í samvinnu ÍTR og menntasviðs eða einhvers staðar annars staðar.

Er lögmál að allt verði að hreyfast á hraða snigilsins? Eftir slétta viku, 11. september, verður sviðsstjórunum sem sagt falið að leiða vinnuna og ætli þeir byrji þá ekki á því að kalla fólk saman til fundar, líklega í vikunni þar á eftir? Þá verður kominn 18. september. Á þeim fundi verður ákveðið að kanna hitt og þetta og hittast að viku liðinni, 25. september, til að ræða það betur. Á þeim fundi átta menn sig á að enn þurfi að kanna eitthvað betur og ganga úr skugga um hitt og þetta. Og væri ekki ráð að funda með skólastjórum? Jú, höfum þann fund í vikunni þar á eftir. Byrjun október, jamm það er nú aldeilis fínt. En best að klára þessi fundarhöld samt tímanlega áður en vetrarfrí skella á í skólum, af því að þá lenda sviðsstjórarnir og allir hinir kannski í mestu vandræðum að mæta á fundi....

Nú þarf borgarstjóri að sýna röggsemina sem hún býr yfir og  skikka sviðsstjórana og allt þeirra fólk til að setjast niður og standa ekki upp fyrr en lausnin er fundin!

Athugasemdir

[Þórhildur Helga Þorleifsdóttir, 4.9.2008 kl. 23:40]

Þú ættir nú bara að athuga strax með færeyskan au-pair gaur................

[Katrín Snæhólm Baldursdóttir, 5.9.2008 kl. 10:40]

Detti mér nú allar dauðar lýs úr höfði........ Já nú skulu starfsmenn okkar í borginni setjast niður og klára vinnuna sína og fara ekki heim fyrr en lausn er fundin.

[Kristin Jónsdóttir (IP-tala skráð) 5.9.2008 kl. 19:59]

Skítt með kerfið...og  gæta barna sinna sjálf á eigin heimili að skóla loknum? já veit, hrikalega gamaldags..... skítt með kerfið :)

[Guðrún (IP-tala skráð) 5.9.2008 kl. 20:21]

Kristín. Já við skulum bara endilega neyða alla til að hætta í vinnunni kl. 2 og sækja börnin í skólann. Eða þeytast á milli barnapía til að leysa málin.

Hlutirnir hafa bara breyst á síðustu áratugum, núna vinna báðir foreldrar úti og samfélagið verður að taka mið af því. Það þýðir ekki að horfa í hlutina eins og þeir voru árið 1950 og miða allt við það.

[Kristin Jónsdóttir (IP-tala skráð) 5.9.2008 kl. 21:33]

Hæ Guðrún, án þess að gera prívat síðu að spjallsíðu! Samt.

ég er ekki einu sinni orðin fertugt, smá frá, fædd um 1970.  ég á samt eitt uppkomið barn! var reyndar í HÍ á þeim árum og einsog áður sagði i mjög erfiðu námi sem tók 5 ár og þar að auki einstæð!

Er þar fyrir utan tvíburi sjálf.... og mikill aðdáandi slíkra.

Eftir sem áður ætti fólk almennt ekki að gera ráð fyrir öðrum en sjálfum sér til uppeldis eigin afkvæma, hvaðan sem þau koma,

hvað börnin sjálf varðar hlýtur það að vera það besta að verja tíma sínum heima fyrir,  m.a eftir skóla og með skólalærdómi svo eitthvað se nefnt. Burt séð frá félagslegu!

AMK, eignaðist eg ekki mitt eina barn fyrir neinn annann  en sjáfa mig  og barnsföður minn sem er sannur uppalandi.  Án þess að gera nokkurn tíma ráð fyrir úrvalsstéttum borgar eða ríkis. svo m0rg voru þau orð.... :=) kristín

[Linda Linnet Hilmarsdóttir, 5.9.2008 kl. 22:07]

[Ragnhildur Sverrisdóttir, 6.9.2008 kl. 15:09]

Ég hætti að vinna úti og var hérna heima við fyrsta skólaárið þeirra. Sem var alveg frábært. Og fólk getur svosem alveg haft þá skoðun að ég, eða Kata, eigi bara að vera heima næstu árin og leysa þetta vandamál.

Staðreyndin er sú, að það flestir vilja hafa samfelldan dag skóla og frístunda og ekki bara af þeim óskaplega eigingjörnu hvötum að "fá" að vinna fullan vinnudag. Samfellan skapar öryggi og öryggi er börnum mikilvægt.

Við Kata erum alls ekki í verstu stöðunni, langt í frá. Umkringdar fólki sem er boðið og búið að hjálpa til. En hvað með einstæða foreldra og tekjulága? Hverjar eru líkurnar á að þeir geti bara skellt sér í 60% vinnu? Og hverjar eru líkurnar á að atvinnulífið þoli að þeir, eða jafnvel allir foreldrar, taki þann pól í hæðina? Er ekki eðlilegt að þeir geri kröfu til þess að staðið verði við stóru orðin um frístundaheimili? Það er ekki eins og krafan sé eingöngu frá foreldrum komin, loforðin hafa líka streymt frá stjórnmálamönnunum. Sem standa ekki við stóru orðin.