Listaspírur

7.9.2008 | 21:40

Systur voru lukkulegar að fá loks Latabæ aftur. Þeim finnst áskrift að Stöð 2 borga sig, bara vegna Latabæjar. Við mæðurnar erum enn að melta þetta með okkur, en getum að vísu alveg hætt að velta vöngum í bili, búnar að skuldbinda okkur með áskrift í marga mánuði.

Við gerðum fátt í dag, sem er afskaplega gott á sunnudögum. Skruppum að vísu á Kjarvalsstaði, þar sem Margrét fór ýmist alveg ofan í myndirnar hans, eða stikaði langt í burtu til að njóta þeirra úr fjarska. Henni fannst mjög merkilegt að sjá mosa og hraun og fossandi ár út úr myndunum í fjarska og svo öll þessi ótrúlegu smáatriði og pensildrætti í nálægð.

Við fórum líka á Listasafn Reykjavíkur og þar fannst þeim skemmtilegra. Stóll sem hangir í rafmagnsgítarstrengjum, herbergi með ljómandi stjörnum og annað sem var upplýst með skærum flúorljósum í bleiku, grænu og fjólubláu. Eintóm hamingja.

Afi Torben og amma Magga komu í mat í kvöld. Systur voru kokhraustar og vildu fara út eftir matinn, að leika við vinkonur sínar. Við rákum þær í hátt og þær eru löngu farnar að hrjótaþ

Flokkur: Bloggar | Facebook

Athugasemdir

Hólí mólí, 12 mánaða binditíminn var einmitt að renna út hjá okkur, og ekki mínútu of seint - þvílíkt vesen að draga HH frá sjónvarpinu á morgnana (þegar hún á að vera að búa sig í skólann) og að "bíða" eftir að Simpson og Friends væru búnir á kvöldin (það má alls ekki segja Vinir á þessu heimili, það þykir mjög púkó ). Svo var það Næturvaktin í fyrra, sem mér fannst nú ekkert barnaefni, og Idolið, Extreme Makeover: Home Edition, Amazing Race og allar bíómyndirnar á Bíórásinni og what not. Áskriftin rann út sl. föstudag og ég hef tekið við daglegum skömmum síðan, eiginlega einelti ... hins vegar byrjaði þetta vesen ekki fyrir alvöru fyrr en í 3. bekk svo kannski bjargast þetta hjá ykkur, hún "frétti" t.d. ekki af barnatímanum á morgnana fyrr en í fyrrasumar, hélt því vandlega leyndu fram að því, ekki láta það spyrjast út!