Sá sem þorir

Við mæðgur sátum við sjónvarpið í vikunni, flettum á milli stöðva og leituðum að einhverju sem systur mættu horfa á fyrir svefninn. Á einhverri rásinni var fyrirsætukeppni og þegar einn dómaranna sást á skjánum lýsti Margrét því yfir að henni þætti hann svo skemmtilegur. Þetta er einhver tískugaur og hattagerðarmaður, skilst mér. Elísabet tók undir að hann væri skemmtilegur og þær töluðu um hvað hann væri óvenjulega klæddur.

Þegar ég nefndi að hann væri hommi, þá rann upp ljós fyrir Elísabetu: "Jájá, ég sé að hann er svona maður sem þorir alveg að vera eins og hann vill vera."

Svo hélt hún áfram og lýsti vini sínum, sem gæti alveg eins verið hommi að hennar mati, af því að hann heilsar stelpum alveg jafn vinalega og strákum og er alveg sama af hvoru kyninu leikfélagarnir eru. Hinum strákunum finnst asnalegt að leika við stelpurnar, en hann gerir nákvæmlega það sem hann sjálfur vill og lætur viðhorf þeirra ekki hafa áhrif á sig.

Skemmtilegar pælingar og mun áhugaverðari en þessi fyrirsætukeppni.

Athugasemdir

[Stefán Benediktsson (IP-tala skráð) 12.3.2010 kl. 16:09]

Þórður heitinn Sigtryggsson sagði: "Bara að viðurkenna að þú sért hommi, þá geturðu allt". Ragnheiður Ásta Pétursdóttir talandi fyrir minni karla á sal í MR veturinn1961, sagði.  "Þegar ég var lítil vissi ég það eitt að allir strákar væru hrekkjusvín nema Stebbi Ben, hann hrekkti ekki stelpur" Þetta var það kvöld sem ég komst næst því að vera hinsegin eins og það var kallað í þá daga. Áttaði mig ekki á því fyrr en löngu síðar að hommar eru ekki hræddir við stelpur.

[Ragnhildur Sverrisdóttir, 13.3.2010 kl. 16:55]

Mikið vildi ég að fleiri guttar kæmust nálægt því að vera hinsegin á þennan hátt. Í tæplega 9 ára heimi dætranna eru stelpur og strákar stríðandi fylkingar. En ætli þau semji ekki vopnahlé nógu snemma . . .