Út í veður og vind

Frá því að ég hætti á Mogga, sem var nú bara fyrir rúmri viku, hef ég verið óskaplega dugleg hér heima við. Bílskúrinn hefur aðallega notið góðs af. Hann er nú til mikillar fyrirmyndar, allt í röð og reglu. Og allt það dót, sem þarf að vera þar yfir veturinn, var komið í skjól áður en snjóaði. Öll garðhúsgögn, stólar, borð og bekkir og líka grillið, gashitarinn og trampólínið.

Þrátt fyrir óveðursspá svaf ég hin rólegasta í nótt. Ég þurfti ekki að hafa áhyggjur af nokkrum sköpuðum hlut við húsið, þetta var allt saman lokað inni í  bílskúr.

Þegar ég leit út um gluggann í morgun sá ég að opnanlegi glugginn á litla kofa systranna hafði fokið upp, rifnað af hjörum og lá í grasinu. Ég benti systrum á þetta, fumandi af óveðursótta. Þær spurðu bara hvort ég ætlaði ekki að laga þetta.

Ég er búin að koma glugganum aftur fyrir, bölvandi og ragnandi í roki og rigningu með skrúfjárn, tangir, borvél og hamar að vopni. Flestir eru handlagnari en ég, en hann hangir samt nokkuð eðlilega á sínum stað og til að tryggja hann enn betur er kominn öflugur krókur að innanverðu.

Þessi óvænta uppákoma mun áreiðanlega ræna mig svefni næstu nótt. Það þarf nú ekki meira til.

Athugasemdir

[Páll Höskuldsson, 9.10.2009 kl. 16:03]

Sæl Ragnhildur. Ég óska þér góðs gengis á tímamótum í lífi þínu, get sagt með sanni að Mogginn er fátækari án þín.

[Ragnhildur Sverrisdóttir, 9.10.2009 kl. 19:33]

Takk fyrir góða kveðju, Páll

[Guðmundur Júlíusson, 9.10.2009 kl. 19:36]

Sæl, í (um höfund) segir að þú hafir verið blaðamaður á Mogganum til 2007, en í blogginu segir þú að þú hafir hætt fyrir um viku síðan, hvort er rétt, og annað, varstu þú ein af þeim góða hóp sem sagt var upp, og þá í kjölfarið hlýt ég að spyrja, því ertu þá að blogga ennþá á þessum vettvangi? margir myndu einfaldlega hætta vegna þessa og blogga annars staðar?  bara forvitinn :) Vegni þér samt vel og gangi þér allt í haginn.

[Ragnhildur Sverrisdóttir, 13.10.2009 kl. 15:52]

Sæll Guðmundur forvitni.

Ég þarf greinilega að laga prófílinn á blogginu! Ég vann á Mogga til 2007, hætti þá í ár, byrjaði aftur í júní í fyrra og sagði svo upp núna í september. Ég hef nú engin áform um að flytja mig af Moggablogginu.